Diretór Jerál SEFOPE, Paulo Alves, akompaña hela benefisiariu ba programa Auto Empregu asina akordu entre SEFOPE, ho Grupu Auto Empregu, iha Kaikoli, 9 jullu 2019. Imajen/Antonia Maia.

DILI, 09 agostu 2019 (TATOLI)-Sekretáriu Estadu Formasaun  Profisionál no Empregu (SEFOPE) aloka orsamentu hamutuk rihun $331 hodi apoia grupu Auto Empregu hosi munisípiu hotu inklui Rejiaun Administrativa Espesiál Oekusi-Ambenu (RAEOA).

Antes atu apoia finanseira ba grupu sira ne’e, SEFOPE liuhosi Diresaun Nasionál Empregu, Departamentu Auto Empregu selebra akordu ida ho grupu auto empregu sira.

Diretór Jerál SEFOPE, Paulo Alves, husu ba benefisiáriu sira atu utiliza osan Estadu nian ho di’ak nune’e bele fó benefísiu hodi ajuda ekonomia família.

“Objetivu hosi programa auto empregu ne’e atu ajuda timoroan sira ne’ebé maka hatama ona proposta iha SEFOPE atu hala’o negósiu hodi fó benefísiu ba aan rasik no ba ema seluk.

“Ha’u hakarak dehan ami iha esperiénsia pasadu ne’ebé ladún di’ak, tanba iha ema barak forma grupu no SEFOPE fó apoia maibé rezultadu laiha, tanba ne’e husu ba imi (benefisiáriu) sira atu uza osan ne’e ho di’ak tanba osan ne’e povu nian”, Paul Alves afirma iha serimónia asinatura ne’ebé hala’o iha salaun enkontru SEFOPE, Kaikoli, ohin.

Paulo Alves relata katak, iha mandatu VI Governu Konstitusionál hasoru dezafiu, tanba iha grupu balu hatama proposta no SEFOPE fó apoiu, maibé bainhira ekipa ba halo monitorizasaun programa la la’o.

Relasiona ho esperiénsia ne’ebé iha tinan anteriór SEPFOPE hasoru, Diretór Jerál ne’e dehan grupu ne’ebé hetan osan hosi programa auto empregu hamutuk ho SEFOPE ba hatán bainhira ekipa auditóriu sira tun halo auditoria.

“Hau la’ós ko’alia ida ne’e atu halo ta’uk, más ha’u hakarak imi ajuda Governu, tanba polítika Governu estabelese programa ne’e di’ak tebes no ita boot-sira iha ona inisiativa, Governu prontu ajuda tanba antes ne’e Governu fó ekipamentu de’it, maibé agora fó osan liuhosi akordu”, Paulo Alves akresenta.

Diretór Nasionál Empregu, Lúcio Beretaci, esplika proposta ne’ebé simu hamutuk 323, hafoin ekipa halo selesaun bazeia ba kritériu ne’ebé estabelese hamenus ba proposta 250, no hosi númeru 250 hamenus ba 94 no hosi totál ne’e, iha de’it proposta 52 maka pasa iha programa auto empregu.

Hosi proposta 52 ne’ebé aprovadu fó benefísiu ba ema hamutuk 228. Grupu hirak ne’ebé kompostu iha proposta hirak ne’e mak hanesan ; grupu ofisina hamutuk 13, hakiak ikan rua, karpintaria 10, rental komputadór rua, hakiak manu lokál tolu, soldadura tolu, produsaun batako rua, kantina rua, alfaiate rua, peska rua, prodús ai kulat ida, hakiak fahi grupu haat, ortikultura no seluk tan.

Entretantu osan ba benefisiáriu sira sei transfere liuhosi Banku Nasionál Komérsiu Timor-Leste (BNCTL-sigla portugés) liuhosi konta ne’ebé iha ona.

Jornalista: Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here