Xefe Kaza Sivíl Prezidensia Repúblika, Francisco Maria de Vasconcelos. Imajen Mídia PR

KOVALIMA, 09 agostu 2019 (TATOLI) – Prezidente Repúblika liuhosi Xefe Kaza Sivíl, Francisco Maria de Vasconselos, ofisialmente entrega karteira hamutuk 130 ba Eskola Bázika Sentrál (EBC, sigla portugés) ÓGUES .

Xefe Kasa Sivíl husu ba alunu sira atu uza kadeira no meza ho didi’ak, labele tuur iha meza leten hafoin hakerek, maibé tuur iha kadeira no tau kadernu iha meza. Nune’e mós profesór sira tenke kuidadu karteira hirak ne’e nu’udar responsabilidade ida.

“Profesór sira tenke kuída kadeira ho meza, tau-matan ba eskola no alunus sira tanba sira maka futuru nasaun nian”, Xefe Kaza Sivíl liuhosi nia intervensaun iha ámbitu entrega karteira ba EBC ÓGUES, iha postu administrativu Maukatar, munisípiu Kovalima, ohin.

Hodi husu tan ba profesór sira atu tau-matan ba estudante sira ho di’ak atu sai matenek, hanorin ho di’ak hanesan hanorin oan sira iha uma, nune’e bele prepara rekursu umanu ne’ebé di’ak ba dezenvolvimentu nasionál.

Nune’e mós nia husu ba estudante sira atu badinas eskola, estuda didi’ak no tenke disiplina, tanba edukasaun maka bele muda ita-nia moris no ema hotu nia moris.

Husu mós ba inan-aman sira atu tau-matan ba oan sira loroloron hodi bá eskola, nune’e mós xefe suku tenke iha responsabilidade ba eskola ida ne’e atu kontrola ho di’ak kuandu ema ruma estraga.

Nia saliénta katak Prezidente Repúblika hanesan matan, ibun, tilun povu nian no la’ós ezekutivu hanesan Governu, maibé esforsu hotu liuhosi parseiru dezenvolvimentu hanesan sosiedade sivíl (Timor-Leste Vision no SABE) nia espiritu kolaborativu ba karteira hirak ne’e, ohin, entrega ofisialmente ba eskola ÓGUES.

Iha serimónia entrega karteira ne’e hetan prezensa hosi Xefe Kaza Sivíl hosi Prezidénsia Repúblika, Vise Ministru Edukasaun, Responsável Timor-Leste Vision, Responsável Saúde ba Ema Hotu (SABE), Autoridade sira Munisípiu Kovalima, profesór sira inklui estudante no abitante balun.

Jornalista : Zezito Silva

Editora : Maria Auxiliadora

HAKEREK NO HATÁN

Please enter your comment!
Please enter your name here