Embaixadór New Zealand ba Timor-Leste, Philip Hewitt. Imajen/Egas Cristovão

DILI, 08 agostu 2019 (TATOLI)-Embaixadór Nova Zelándia ba Timor-Leste, Philip Hewitt, hatete Nova Zelándia kompromete kontinua ajuda Governu Timor-Leste liuhusi Ministériu Agrikultura no Peska (MAP) hodi intensifika setór akikultura iha país.

Nia dehan, durante ne’e kooperasaun entre Governu Timor-Leste ho Nova Zelándia iha área akuakultura liuhusi organizasaun Nova Zelándia nian ne’ebé hanaran World Fish ne’ebé konsege estabelese fini hakiak ikan iha Munisípiu Bobonaru, Baukau no Ermera.

Tuir diplomata ne’e katak husi fini hakiak ikan ne’ebé Governu Nova Zelándia halo hatudu kualidade ne’ebé di’ak, tanba ne’e bá oin Nova Zelándia sei intensifika área akikultura nune’e bele hakiak ikan di’ak liután.

“Área akuakultura iha Timor-Leste parte interesante tebes, nune’e Nova Zelándia sei kontinua apoia Timór através parseiru dezenvolvimentu Governu Nova Zelándia nia World Fish”, Philip salienta iha Forum Nasionál Akuakultura ba daruak iha Timor-Leste, iha Timor Plaza, Dili, ohin.

Embaixadór ne’e hatete apoia Timor- Leste iha akuakultura ne’e garantia ba sustentabilidade hahán iha Timor-Leste no tulun ida ne’e, iha 2030 Timór bele sai hanesan konsumidór ikan ne’ebé di’ak liu.

Ministru Agrikultura no Peska, Joaquim José Gusmão dos Reis Martins, hatete kontinua buka serbisu hamutuk ho parseiru sira atu intensifika setór akikultura iha rai-laran tanba ida ne’e bele fó benefísiu ba Timor-Leste liuhusi garantia nutrisaun ba timoroan sira.

Iha Forum Nasionál Akuakultura, Ministru Joaquim hatete eventu ida ne’e importante tebes tanba bele halibur Governu, sientista, emprezáriu, Organizasaun Non Governamentál (ONG) no komunidade lokál hodi fahe esperiénsia, halo analiza, konsolida hanoin hodi hamosu rekomendasaun ba dezenvolvimentu akuakultura iha Timor-Leste.

“Hau hein katak esforsu koletiva hanesan ne’e bele haforsa liután iha futuru hodi responde ba preokupasaun sira povu nian, solusiona ba problema seguransa ai-han no má nutrisaun nu’udar prioridade importante ba Governu Timor-Leste.

Nia dehan : “Atu atinje trajetu ida ne’e, ikan ne’ebé kaer husi tasi de’it sei la kobre demanda ne’ebé aumenta hela de’it, entaun Governu identifika ona dezenvolvimentu akuakultura iha papél importante hodi kontribui ba realizasaun mehi ida ne’e”.

Tuir estratéjia nasionál produsaun akuakultura sei to’o tonelada 12,000 iha 2030, husi parte seluk Governu mós hakarak lori ikan hakbesik ba umakain sira ho folin baratu.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here