Ilustrasaun

DILI, 08 agostu 2019 (TATOLI)-Ministériu Ensinu Superiór Siénsia no Kultura (MESSK) sei kria sistema foun ida katak estudante timoroan sira ne’ebé gradua ka hakotu ona sira-nia estudu iha estranjeiru fila mai Timor-Leste (TL) aprezenta mós teze ba MESSK atu bele fortifika liután verifikasaun ba sira-nia diploma.

“Tanba meius ne’ebé mak ministériu uza hodi verifika diploma estranjeiru ne’e liu de’it husi internet. Maibé, ba oin sistema foun MESSK sei kria atu nune’e bele responde kuandu mosu fallansu ka kazu ruma ho diploma sira ne’e,” informa Diretora Jerál Ensinu Superiór, MESSK, Maria Fernanda lay ba jornalista TATOLI iha ninia Gabinete MESSK, Colmera (08/08/2019).

Nia haktuir, durante ne’e laiha problema kona-ba verifikasaun diploma estudante ensinu superiór ne’ebé eskola iha li’ur. Maibé, ministériu iha nafatin obrigasaun atu kria sistema di’ak liután atu bele kontrola nafatin diploma estranjeiru nian.

Kooperasaun di’ak ne’ebé MESSK Timor-Leste halo ho autoridade instituisaun ensinu superiór sira iha rai li’ur la’o di’ak loos. Dala barak MESSK sempre halo kontaktu ho instituisaun sira kuandu estudante timoroan sira lori ona sira-nia diploma atu hetan verifikasaun husi ministériu.

“Ami atu halo verifikasaun ba diploma ne’ebé ita-nia estudante sira foti iha rai li’ur, dala barak ami sempre kontaktu ba instituisaun relevante sira hodi hetan klarifikasaun kona-ba diploma sira ne’e kuandu loos ona ami verifika ka legaliza,” tenik Diretora Maria Filomena.

Diretora ne’e haktuir tan katak durante ne’e ninia parte seidauk hetan kazu ida kona-ba diploma ne’ebé estudante sira aprezenta ba ministériu atu legaliza. Maibé, tuir nia, obrigasaun VIII Governu Konstitusionál nian liuhusi MESSK nafatin fó importánsia atu kria sistema ida di’ak liu atu bele minimiza fallansu seluk ne’ebé tempu ruma bele akontese.

“Ita sei husu ba embaixadór sira iha rai li’ur atu tulun mós ministériu hodi relata mós dadus estudante sira ne’ebé eskola iha li’ur atu nune’e bele fasilita di’ak liután tan servisu MESSK nian atu verifika diploma sira ne’e,” nia dehan.

Enkuantu, diploma rai laran nian, Diretora Maria Fernanda hateten, buat hotu la’o di’ak tanba diploma sira ne’e atu hetan verifikasaun sempre publika iha Jornal da Repúblika.

Jornalista: Tomé Amado

Editór.     : Rafy Belo

HAKEREK NO HATÁN

Please enter your comment!
Please enter your name here