Illa Atauro. Foto: Geoturismo Timor Leste

ATAURO, 08 agostu 2019 (TATOLI)-Dezenvolvimentu infraestrutura bázika hanesan estrada, liña eletrisidade, saúde, edukasaun no bee moos iha Postu Administrativu Atauro, Munisípiu Dili sei iha difikuldade.

“Suku lima ne’ebé eziste iha Postu Administrativu Atauro mak suku rua: Maquili ho Makadade, iha ona estrada maibé kondisaun estrada mak aat tebes,” informa Administradór Postu Administrativu Atauro, Mateus Belo ba Ajénsia TATOLI iha nia knaar fatin, Maumeta villa, Atauro, kinta (08/08/2019).

Tanba ne’e, tuir administradór postu administrativu Atauro ne’e katak ho kondisaun estrada ne’e difikulta suku rua ne’e hodi transporta sira-nia produtu ba iha merkadória. Nia hatutan, Suku Maquili no Makadade iha liña eletrisidade maibé iha suku laran de’it seidauk to’o aldeia. Situasaun hanesan, iha mós Suku Biqueli.

Iha biban hanesan, Administradór Postu Administrativu Atauro, Mateus Belo informa katak atividade ekonómika iha Atauro la’o maka’as tebes inkluzivamente restaurante no atividade otelaria maibé bee moos sei sai difikuldade.

“Atauro ikus-ikus atividade la’o maka’as ona maibé falta mak bee moos tanba asuntu bee moos ita liga ba infraestrutura bázika ne’e mós apoiu ba dezenvolvimentu; parte ekonomia liuliu turizmu ne’ebé mak la’o di’ak tebes, presiza kondisaun ne’ebé di’ak hodi bele garante ba iha dezenvolvimentu Atauro nian,” nia rekoñese.

Administradór Mateus Belo esplika, dezenvolvimentu ne’ebé importante  no loke odamatan ba Atauro mak portu Beloi ne’e tanba ne’e presiza hadi’a hodi atrai vizitante sira husi nasaun seluk mai vizita Atauro ne’e rasik no liga mós ba portu marítima tanba agora daudaun foin mak hala’o hela, movimentu transporte mós la’o iha loron kinta ho sábadu, ida ne’e mós difikuldade boot ba turista mai vizita illa Atauro.

Bee mós afeta ba saúde, edukasaun no kualidade moris ema nian entaun bee moos mak sai hanesan asuntu importante ba komunidade Atauro.

“Tanba infraestrutura bázika ne’e mós importante tebes oinsá atu halo dezenvolvimentu ba iha Atauro no  Postu Administrativu Atauro halo ona proposta hodi harii sentrál elétriku iha Atauro hodi extende mós enerjia ne’e ba suku sira liuliu aldeia sira  ne’ebé seidauk asesu ba liña eletrisidade,” informa Administradór Mateus Belo.

Autoridade másimu Postu Administrativu Atauro ne’e akresenta katak estatutu Atauro sai hanesan illa ida ne’ebé mak tuir konstituisaun RDTL (Repúblika Demokrátika Timor-Leste)-artigu 5o alinea 3, define ona atu halo ekonomia espesiál hanesan ZEEMS (Zona Espesiál Ekonomia Sosiál Merkadu) iha Oe-cusse, durante tinan hira ona Atauro hato’o proposta ba Governu Sentrál hateten ZEEMS oe-Cusse la’o, Atauro mós tenke la’o maibé sira hein hela. To’o agora Atauro mak enfrenta nafatin ba infraestrutura bázika maibé esforsu nafatin sei sai di’ak.

“Aleinde ne’e populasaun ne’ebé iha Postu Administrativu Atauro iha suku lima  mak hanesan suku Beloi populasaun  424,  suku Biqueli 681,  suku Makadadi populasaun  490,  suku Maquili  populasaun  489  no villa Maumeta 370  no totál ba populasaun sira iha suku lima hamutuk 2.454 iha postu Administrasaun Atauro, Munisipiu Dili nian” relata Administradór Postu Administrativu Atauro, Mateus Belo.

Jornalista: Felicidade Ximenes

Editór     : Rafy Belo

HAKEREK NO HATÁN

Please enter your comment!
Please enter your name here