Mikrolete 012. Foto/Natalino Costa.

DILI, 07 agostu 2019, (TATOLI)-Mikrolete 012 ne’ebé halo operasaun rute husi Lesidere to’o Areia Branka (Pasir Putih), ohin, halo asaun greve hodi husu ba Diresaun Nasionál Transporte no Terrestre (DNTT) Ministériu Transporte no Komunikasaun (MTK) atu aumenta tan rute ida ba sira.

Portavós mikrolete 012, Hélder Sarmento Fátima, hatete rute ida agora DNTT fó ba mikrolete 012 ne’e badak liu.

“Ami ladún satisfás tanba ne’e ami husu atu aumenta”, nia dehan ba jornalista TATOLI iha Largo Lesidere, ohin, bainhira halo asaun greve ne’e.

Nia lamenta tanba rute ne’ebé DNTT fó ne’e husi Bidau-Lesidere to’o eskola Paulu Sestu, mai fali iha Bidau-Lesidere, Largo no bá fali de’it iha Areia Branka. Tanba ne’e husu DNTT atu aumenta rute operasaun bele dook liután.

“Uluk bazeia ba despaxu husi DNTT nian Mikrolete 012 halo opresaun to’o iha Kristu Rei, maibé agora mikrolete 012 to’o de’it Areia Branka tanba ne’e ami propoin ona ba DNTT atu aumenta tan bá iha Kristu Rei tanba pasajeiru barak, estranjeiru tantu nasionál bá Kristu Rei”, sujere kondutór ne’e hodi husu tan atubele aumenta rute hamutuk ho mikrolete 01.

Aléinde kestaun rute, portavós ne’e mós preokupa ba iha pasajeiru sira ne’ebé maka menus no selu la tuir tarefa ne’ebé DNTT fó ona.

Hatán ba preokupasaun ne’e, Xefe Departamentu Tráfegu DNTT, João Eugénio da Silva, hatete DNTT sei la admite diresaun ba mikrolete 012.

“Ami (DNTT) sei la fó no la aumenta tan rute ne’e tanba rute ne’e rasik desizaun DNTT fó ona tanba ne’e tenke kumpre”.

Joao Eugenio hatutan kuandu DNTT hanaruk tan rute ba iha 012 maka mikrolete tolu ka haat bele halo operasaun iha diresaun ida no ne’e difikulta mikrolete husi diresaun seluk no bele kria dezentendimentu.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here