Xefe Estadu Maiór Jenerál F-FDTL, Majór Jenerál, Lere Anan Timur. Imajen/ António Gonçalves

DILI, 7 agostu 2019 (TATOLI) – Xefe Estadu Maiór Jenerál FALINTIL-Forsa Defeza Timor-Leste (F-FDTL), Lere Anan Timur, hateten dezde instituisaun F-FDTL ho Polísia Nasionál Timor-Leste (PNTL) halo operasaun konjunta ba grupu deskoñesidu sira, lori benifísiu tanba povu bele moris hakmatek.

Lere dehan, agora dadauk povu moris hakmatek tanba operasaun konjunta fó presaun maka’as ba grupu deskoñesidu sira ne’ebé komete krime no halo povu sempre la hakmatek.

“Operasaun konjunta ne’e la’ós de’it lori presaun  ba ema kriminozu sira, maibé ita garante katak  oras ne’e povu moris ho hakmatek”, tenik Lere hafoin enkontru semanál ho Prezidente Repúblika, Francisco Guterres Lú Olo, iha Palásiu Prezidensiál, Bairro Pité, kuarta ne’e.

Líder másimu instituisaun dezeza ne’e subliña, iha ne’ebé de’it Estadu mak iha podér no kompeténsia atu kaer grupu kriminozu sira hodi grupu hirak ne’e labele ukun nasaun.

Nune’e, nia fó konfiansa tomak ba ninia membru sira iha terrenu atu labele fó toleránsia ba kualker grupu deskoñesidu, ne’ebé mak hakarak destroi estabilidade iha nasaun ne’e no sei responsabiliza atuasaun violasaun direitu umanu.

Lere observa, dezde diretiva ne’e sai, to’o oras ne’e operasaun konjunta seidauk detein grupu ka pesoál ruma ne’ebé komete krime.

Antes ne’e, liuhosi rede sosiál, públiku kestiona kona-ba operasaun konjunta defeza no seguransa, tanba lori presaun ba povu.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here