Kompañia M JOFERSI halo re-instala liña eletrisidade iha sítiu istóriku João Paulo II. Imajen TATOLI/Osória Marques

DILI, 07 agostu 2019 (TATOLI)-Atu komemora tinan-20 loron konsulta popular (30 agostu 1999-30 agostu 2019) no prezensa misaun INTERFET, Governu liuhosi Ministériu Obra Públika (MOP) aloka rihun $92 hodi re-instala liña eletrisidade iha sítiu istóriku João Paulo II.

Re-instala liña eletrisidade iha Jardín João Paulo II. Imajen/Osória Marques

Pakote instalasaun liña eletrisidade ne’e ezekuta hosi kompañia M JOFERSI.

Diretora  kompañia M JOFERSI, Maria J. P. da Silva, hatete, kustu ba projetu ne’ebé kompostu hosi re-instalasaun solár panel, eletrisidade iha jardín no lampu estrada ninin hamutuk rihun $92.

Iha biban seluk, Xefe Tékniku kompañia M JOFERSI, Iwan Christyanto Yap, informa, ninia ekipa  tékniku hahú  re-instala solár panel, ahi jardín no mós lampu ne’ebé konstrui ona antes ne’e iha  dalan ninin área João Paulo II nian.

“Iha  semana rua nia laran ne’e, to’o loron 25 agostu, tinan ne’e, ami tenke finaliza ona servisu ne’e,” informa Xefe Tékniku ne’e ba Ajénsia TATOLI, iha João Paulo II Tasi-Tolu.

Nia salienta ekipa tékniku daudaun ne’e finaliza ona re-instalasaun solár panel no lampu sira  iha estrada ninin. Maibé ba lampu jardín iha ona prosesu re-instalasaun tanba tenke kee sai fiu ne’ebé antes ne’e instala iha rai okos.

Nia garante sei finaliza projetu ne’e hodi entrega ba Governu tuir kontratu servisu.

Jornalista : Osória Marques

Editór       : Francisco Simões

1 KOMENTÁRIU

  1. Husu ba ministerio obras publiku atu halo mos koperasaun ho ministerio turismu no diresaun nasional Siguransa sivil atu monta Siguransa iha fatin refere hodi nune ba oin labele estraga no gasta bebeik osan hodi reinatala fatin ne

HAKEREK NO HATÁN

Please enter your comment!
Please enter your name here