Jerente Nasionál ConocoPhilips iha Timor-Leste (TL), José Lobato Gonçalves. Imajen Tatoli/Egas Cristóvão

DILI, 7 agostu 2019 (TATOLI)—Jerente Nasionál ConocoPhilips iha Timor-Leste (TL), José Lobato Gonçalves ho ekipa hasoru malu ho Primeiru-Ministru (PM), Taur Matan Ruak, iha Palásiu Governu, Dili, kuarta ne’e.

Iha oportunidade hasoru malu ne’e, ekipa husi ConocoPhilips kongratula Governu ne’ebé serbisu maka’as ba Tratadu Fronteira Marítima (FM) ne’ebé sei troka nota entendimentu iha fulan ne’e nia rohan.

Hafoin hasoru malu,  José Lobato hateten  aleinde kongratula Governu,  ekipa mós  hatudu sira-nia prontidaun hanesan operadór Bayu-Undan iha jurizdisaun foun bainhira tratadu ne’e tama iha vigór.

Ekipa ne’e mós hato’o ba Primeiru-Ministru hodi esplika kona-ba lala’ok produsaun Bayu-Undan ne’ebé tuir estimasaun sei to’o iha 2021-2022. “Ami-nia estimasaun boot liu maka iha janeiru  2022,” hateten José Lobato.

Nia hatutan,  bainhira produsaun hotu, sei iha obrigasaun atu dezmantela plataforma ne’ebé iha. Kona-ba ne’e, José tenik, Primeiru-Ministru hato’o obrigadu tanba iha fevereiru liu-ba PM rasik hala’o ona vizita ba plataforma Bayu-Undan.

Aleinde ne’e, nia haktuir, PM mós lori Governu nia naran promete sei fasilita serbisu kompañia, bainhira tratadu tama iha vigór.

Lobato fó hanoin katak oras ne’e dadaun, Bayu-Undan iha hela área konjunta ne’ebé la kle’ur sei tama iha área jurizdisaun ka ne’e pursentu 100 Timor-Leste mak sai na’in.

Tanba ne’e,  sei iha asuntu barak mak  tenke halo. Nia fó ezemplu katak uluk traballadór estranjeiru (malae) sira ba iha Bayu-Undan la presiza vistu, maibé ohin loron tenke tuir regra Timor-Leste no tenke uza vistu Timor.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here