Komandante FALINTIL, Tera Mau Bulak. Imajen/Nelson de Sousa

VIQUEQUE, 06 agostu 2019 (TATOLI)-Komandante FALINTIL, António da Costa “Tera Mau Bulak” husu ba Xefe Estadu Maior FALINTIL atual Primeiru-Ministru (PM), Taur Matan Ruak, atu tau atensaun uitoan ba dezenvolvimentu infraestrutura bázika iha Viqueque.

Tera Mau Bulak hateten, Viqueque hanesan mós munisípiu ida hosi ponta leste ne’ebé ativa tebes iha prosesu luta to’o ukun rasik aan. Maibé, iha faze ukun aan ne’e, Viqueque pasiva hosi dezenvolvimentu.

Tera Mau Bulak hato’o lia hirak ne’e bainhira partisipa festa kosulta populár ba dala-20 (30 agostu 1999-30 agostu 2019) no prezensa misaun INTERFET iha Timor-Leste, ne’ebé hala’o iha Viqueque, segunda (05/08/2019).

“Husu ba oitavu governu ne’ebé lidera husi Primeiru ministru Taur Matan Ruak atu tau atensaun ba ami Viqueque,” afirma veteranu Tera Mau Bulak.

Nia hateten, ih funu laran, inan-aman sira ativu tebes apoiu luta uda ne’e, maibé iha faze ukun aan, inan-aman sira ladún sente dezenvolvimentu ida ativu.

Iha fatin hanesan Gil Martins nu’udar komunidade ho Maria Odete nu’udar mate restu Masakre Krarás, espresa sira nia ksolok ba komemorasaun festa popular no istóriku ne’e, maibé husu Governu atu foku atensaun ba dezenvolvimentu infraestrutura iha munisipiu, suku to’o aldeia sira.

Jornalista : Nelson de Sousa

Editór : Francisco Simões

HAKEREK NO HATÁN

Please enter your comment!
Please enter your name here