Komandante Polisia Munisípiu Dili, Superintendente Xefe, Armando Monteiro ho ekipa hala’o konferénsia imprensa hodi fó sai servisu PNTL kaptura ona suspeitu soe bebé iha Merkadu Taibesi no suspeitu oho Guilhermino iha Fatu- Ahi. Imajen/PNTL

DILI, 06 agostu 2019 (TATOLI) – Polísia Nasionál Timor-Leste (PNTL) detein ona suspeita EBM (tinan 27) ne’ebé soe bebé iha  área besik Merkadu Taibesi, Dili no suspeitu oho vítima Guilhermino da Costa de Jesus, iha área Fatu-ahi, domingu (28/7) foin lalais ne’e.

Notísia Relevante : MSSI Halo’ot Bebé Deskoñesidu Na’in Rua Iha Semitériu Becúse

Bebé ho sexo mane ne’e, suspeita  EBM soe iha sesta (2/8/2019) tuku 20:00, hetan hosi negosiante balun  ho kondisaun isin mate ona falun iha saku mutin ida nia laran.

Hafoin soe bebé, suspeita halai kedas ba ninia uma, no negosiante ho komunidade ne’ebé hetan bebé, koopera ho PNTL inklui Ofisiál Polísia Suku (OPS)  lori  bebé nia isin ba hala’o autópsia iha Ospitál Nasional Guido Valadares (HNGV-sigla portugés).

Alende ne’e, parte PNTL kontinua koopera ho autoridade rekolla informasaun  hosi komunidade no buka tuir suspeitu to’o hetan ninia hela fatin iha Dili.

“Kazu krime infantisídiu (soe bebé) akontese iha Tasitolu, Santa Krús no Merkadu Taibesi ho esforsu tomak deskobre autór (soe bebé) nu’udar na’in ba prosesu”, informa Komandante Polísia Munisípiu Dili,  Superintendente Xefe, Armando Monteiro, liuhosi konferénsia imprensa iha Komandu PNTL Munisípiu Dili, ohin.

Armando dehan ekipa PNTL sei halo investigasaun kle’an hodi husu razaun saida maka EBM soe bebé, no mane sé mak fó oan to’o lakohi responsabiliza, ikus tenke soe bebé.

“Ita sei investiga kle’an para buka hatene razaun hotu- hotu”, tenik Komandante Armando Monteiro.

Komandante polísia ne’e apela ba inan aman sira kontrola oan feto no oan mane sira hodi labele monu ba tentasaun sira ne’ebé bele estraga labarik sira nia futuru.

Kona-ba mate isin hosi Guilhermino parte Diresaun Forensik HNGV halo ona autópsia no entrega ona ba família hodi hala’o serimónia funerál.

“Ita identifika mós kazu oho komunidade ida iha Fatu-Ahi nian no prosesa kedas ba Ministériu Públiku”, tenik nia.

Maski la temi naran kompletu suspeitu ne’ebé oho vítima Guilhermino da Costa de Jesus, maibé Komandante Armando esplika prosesu sei lori ba Ministériu Públiku maka bele esplika.

Nia dehan, akontesimentu oho iha Fatu-Ahi nu’udar krime sei prosesa tuir lei hodi autór bele responsabiliza aktu halakon ema seluk nia vida.

Hafoin konferénsia imprensa, polísia kontinua lori suspeitu na’in rua ne’ebé taka  oin metin tama kedas ba sala investigasaun.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here