Bispu Virgilio do Carmo da Silva, SDB, halo entrevista ho jornalista sira iha Dare, tersa (06/08/2019). Imajen/Agapito dos Santos

DARE, 06 agostu 2019 (TATOLI)-Igreja katólika Timor-Leste sei organiza konsentrasaun juventude katóliku hosi Dioseze Baucau, Dili ho Maliana, iha agostu nee nia laran, atu selebra krús joven iha Iliomar, Dioseze  Baucau.

“Fulan ida ne’e iha Iliomar, ita sei selebra krús joven hodi halibur joven timor laran tomak  hodi tuir kongresu juventude,” informa Bispu Dioseze Dili, Mgr. Virgilio do Carmo da Silva, SDB, ba jornalista sira , ohin, iha Dare.

Tuir planu, kongresu juventude katóliku ne’e sei partisipa mós hosi reprezentante juventude katóliku hosi Indonézia.

Bispu Dioseze Dili, Mgr. Virgilio do Carmo da Silva, SDB, informa mós katak, iha tinan 2019 ne’e, Igreja Katólika lansa nu’udar tinan pastoral foin-sa’e atu banati tuir mensajen Sua Santidade Papa Francisco  nian hodi fó importánsia ba juventude  nu’udar  futuru nasaun.

“Hahú agora ita  tenke hahú kuda valór evanjellu no domin ba foin-sa’e sira,” afirma Bispu Virgilio do Carmo da Silva, SDB.

Iha loron 11 fulan agostu iha katedrál Dili sei loke tinan jubilee extra-ordináriu Misionáriu ne’ebé antes ne’e Papa Francisco lansa ona ba sarani sira iha mundu tomak atu halo tuir.

Jornalista          : Agapito dos Santos

Editór                : Francisco Simões

HAKEREK NO HATÁN

Please enter your comment!
Please enter your name here