Bispu Virgilio hamutuk ho konvidadu importante sira husik manu falur iha serimonia seminariu internasionál AEYG iha Dare, tersa (06/08/2019). Imajen/Agapito dos Santos

DARE, 06 agostu 2019 (TATOLI)-Bispu Dioseze Dili, Mgr. Virgilio do Carmo da Silva, SDB,  apresia ho semináriu internasionál Asia East Youth Gathering (AEYG) ne’ebé organiza hosi Kongregasaun Claretianu iha Timor-Leste.

Bispu Virgilio halo entrevista ho jornalista sira. Imajen/Agapito dos Santos

“Atividade ne’e nia furak tanba haree hosi tema nee rasik kona-ba solidariedade sarani ninia mai hosi Kristu rasik maka obriga sarani ida atu ba fa’an, fó no partilla ninia moris ho  ema seluk,” hateten Bispu Virgilio, ohin, hafoin abertura ba eventu ne’e iha uma Retiru Dare, Dioseze Dili.

Saserdote Uma Kreda Lokál Dioseze Dili nian ne’e konsidera tema solidariedade interesante ba Timor-Leste iha moris ohin loron tanba sentimentu solidariedade entre Timoroan hahú mihis hodi hanoin sira ninia aan rasik.

“Espíritu solidariedade importante atu kuda iha foin-sa’e sira nia aan tanba ohin loron ita moris iha mundu ida ne’ebé ema ida-idak hanoin kona-ba ninia aan, hanoin kona-ba ninia interese no egoízmu maka maka’as dala barak fahe família, komunidade no sosiedade,” afirma, Dom Virgilio do Carmo da Silva, SDB.

Bispu Virgilio  fiar katak ho seminar internasionál AEYG ne’e sei tulun joven sira atu moris ho domin hodi fahe solidariedade mútua entre Timoroan.

Joven katóliku sira hosi nasaun ualu (8) konsentra iha Dare hahú segunda (05/08/2019), kompostu hosi Indonézia, Filipina, Srilanka, Taiwan, Korea, Macau, Honkong, Timor-Leste hodi partisipa Semináriu Internasionál  ne’e.

“Partisipante seluk mós mai hosi Polónia, India, España ho nia objetivu maka reja hamutuk, formasaun kona-ba vida sarani no tópiku iha tinan ida ne’e ita haburas solidariedade katak iha ita ninia simplisidade bele tulun malu la’ós ita riku maka foin tulun malu,”  hateten Padre Pároku São José Ai-mutin Dili, Emanuel Lelo Talok, C,M.F.

Jornalista          : Agapito dos Santos

Editór                : Francisco Simões

HAKEREK NO HATÁN

Please enter your comment!
Please enter your name here