Koordenadora Unidade Planeamentu Monitorizasaun no Avaliasaun (UPMA), Brígida Soares. Imajen Egas Cristovão

DILI, 06 agostu 2019 (TATOLI)-Timor-Leste aprezenta ona relatóriu Objetivu Dezenvolvimentu Sustentável (ODS) iha Organizasaun Nasaun Unida (ONU), Nova Iorke no hetan entuziazmu maka’as husi nasaun estadu membru sira inklui fó apresiasaun no mós pergunta sira.

“Hosi esperiénsia husi Sekretariadu VNR (Volunteer National Report) hasoru iha ne’ebá (Nova Iorke) bainhira tempu Timor-Leste halo aprezentasaun hetan entuziasma maka’as hosi nasaun estadu membru sira seluk ne’ebé mak fó sira-nia apresiasaun liuhosi sira-nia pergunta, ne’ebé mak husu direita ba Timor-Leste,” haktuir Koordenadora Unidade Planeamentu, Monitorizasaun no avaliasaun (UPMA), Brígida Soares ba Ajénsia TATOLI iha Ministériu Finansas Ai-tarak Laran, tersa (06/8/2019).

Koordenadora UPMA, Brígida Soares informa katak iha aprezentasaun ODS husi Timor-Leste hetan apresiasaun di’ak no apresiasaun sira mai kedas ho follow up meeting (enkontru atualizasaun).

Follow up meeting sira mak teknikamente hasoru malu ho Sekretariadu no mós reprezentante hosi entidade governamentál sira hanesan Ministériu Edukasaun, Setór Privadu, Juventude no mós Komisária Direitu Labarik hodi ko’alia kona-ba planu ne’ebé mak nasaun sira no organizasaun internasionál sira marka prezensa iha ne’ebá hakarak atu fó apoiu finansiamentu,” haktuir koordenadora ne’e

“Finansiamentu ne’e ba liu iha apoiu rekursu dezenvolvimentu, rekursu umanu ne’ebé mak ba daudauk ne’e ita-nia rai ka nasaun hasoru, no mós mai kedas hosi ita-nia relatóriu VNR ne’ebé mak aprezenta iha ne’ebá,” haktuir tan koordenadora ne’e.

Koordenadora UPMA ne’e informa mós katak durante aprezentasaun ODS Timor-Leste nian iha Nova Iorke, rekomendasaun husi estadu membru sira kuaze la iha maibé sira hato’o sira-nia agradesimentu ba Timor-Leste.

“Nu’udar nasaun ida ne’ebé foun maibé konsege kontinua apoiu nasaun sira ne’ebé mak iha frazil nia laran, nasaun sira ne’ebé mak tama nu’udar membru g7+; iha ne’ebá nasaun barak ne’ebé mak Timor-Leste fó apoiu ba, liuliu fó apoiu ba orsamentu, tékniku,  rekursu ba eleisaun ninian, ida ne’e sira rekoñese iha ONU,” hateten Koordenadora UPMA, Brígida Soares.

Notísia relevante:TL Sei Aprezenta Progresu Dezenvolvimentu Liuhusi Aprezentasaun ODS

Jornalista : Nelia Fernandes

Editór       : Rafy Belo

HAKEREK NO HATÁN

Please enter your comment!
Please enter your name here