Diretór Jerál Turizmu, José Filipe Dias Quintas. Imajen Egas/Cristovão.

DILI, 06 agostu 2019 (TATOLI)-Diretór Jerál Turizmu, Ministériu Turizmu, Komérsiu no Indústria (MTKI), José Filipe Dias Quintas, informa ró kruzeiru Pacific Dawn husi Austrália, aban, vizita Timor-Leste ho pasajeiru no tripulante ró hamutuk 2.020 no totál turista de’it hamutuk 1.658.

Vizita kruzeiru ne’e, nia dehan, MTKI ho ekipa liña ministeriál aliña ba loron komemorasaun tinan 20 Konsulta Populár no Misaun INTERFET (Forsa Internasionál ba Timor-Leste) nia ne’ebé sei selebra iha loron 30 agostu tinan ne’e.

Tuir oráriu, vizita kruzeiru sei to’o Timor-Leste iha tuku 7:00 dadeer no turista sira iha Timór-Leste kuaze oras ualu nia laran. Ró ne’e nia rute husi Europa to’o Darwin-Austrália mai iha Timor-Leste no kontinua bá illa Komodo, Indonézia.

“Vizita ró kruzeiru, ita tenke hatudu no promove imajen Timor-Leste ba mundu katak iha nasaun ne’e sítiu turístiku ida ne’ebé seguru no estavel, liuliu garante pás no estabilidade”, Diretór Jerál Turizmu afirma liuhusi konferénsia imprensa iha Sentru Konvensaun Dili (CCD, sigla portugés), ohin.

Nia salienta pasajeiru ka turista sira ne’e maioria husi Austrália, Alemaña, Kanadá, Olanda  no Fransa inklui balun husi Ázia.

Diretór Jerál ne’e afirma turista balun sei  vizita fatin turístiku sira hanesan Railaku-Ermera, Prizaun Aipelu-Likisá no área turístika sira iha kapitál Dili hanesan Kristu Rei, Muzeu Rezisténsia, Muzeu Chega no Dare.

“Ha’u husu ba populasaun tomak liuliu transporte públiku sira atu atende turista sira ho di’ak hodi hatudu ita-nia imajen ba mundu ho di’ak”, katak.

Iha mós atividade ne’ebé MTKI prepara ona hanesan fa’an produtu lokál  liuhusi KOR TIMOR, ALOLA Foundation, THING and Stories, Kafé Uut , nuu laloir, tais, estátua no Boneka Ataúru  iha tasi-ibun Largo Lesidere nian.

Diretór Concierge Confiavel de Timor, Ricki E. Agon Pinto. Imajen Egas/Cristovão.

Iha fatin hanesan, Diretór Kompañia Concierge-Confiavel de Timor, Ricki E. Agon Pinto, hateten  prepara ona tourism bus no mini bus  hamutuk 50  atu tula pasajeiru ró kruzeiru nia atu vizita bá fatin turístika sira iha kapitál Dili, Likisá no Ermera.

“Buat hotu ami prepara hotu ona ne’ebé sira (turista sira) mai ami tula bá vizita de’it fatin turístika sira”, katak.

Ró Kruzeiru Pacific Dawn propriedade husi Carnival Corporation no nia operasaun liuhusi P&O Kruzeiru Austrália nian. Ró ne’e konstrui iha tinan 1991 husi estaleiru Fincantieri iha Monfalcone Itália hanesan Princessa Regal, ho destinu Súl Pasífiku no hetan sertifikadu Of British Registry Reinu Unidu Londres, operasaun iha tinan 1995 ho naruk metru 245.08 no altura metru 56,00 (183 ft 9 in).

Jornalista: Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here