Aprezentasaun dansa tradisionál hodi komemora loron konsulta populár ba dala-20 (30 agostu 1999-30 agostu 2019) iha Munisípiu Viqueque, Segunda (05/08/2019). Imajen/Nelson de Sousa

VIQUEQUE, 05 agostu 2019 (TATOLI)-Grupu artezanatu, múzika tradisionál no múzika rezisténsia hosi Munisípiu Viqueque selesionadu tuir kompetisaun nasionál iha Dili.

Kompetisaun kulinaria ho hahan tradisionál. Imajen/Nelson de Sousa

Grupu tolu ne’e  iha direitu hafoin sai manan na’in ba primeiru lugar iha kompetisaun    nivel munisipál, kompostu hosi  grupu artezanatu Mundu Perdidu hosi Postu Administrativu Ossu, grupu múzika rezisténsia nafatin hosi  Ossu, ho grupu múzika tradisionál hosi postu administrativu Viqueque Vila.

Festa konsulta popular ba dala-20 (30 agostu 1999-30 agostu 2019) ba loron ohin nian iha Viqueque prienxe ho atividade kompetisaun hanesan, kulinária hodi aprezenta hahán tradisionais, artezanatu, múzika rezisténsia, dansa tradisionais, poema ho jogu rekreativu hanesan sa’e bua.

Grupu múzika rezistensia. Imajen/Nelson de Sousa

Partisipante sira mai hosi postu administrativu lima, mak hanesan Viqueque Vila, Lacluta, Uatolari, Uatucarabau no Ossú ne’ebe pertense ba Munisipiu Viqueque.

Prezidente komisaun organizadora, Marito da Costa, ba Ajénsia TATOLI hateten, grupu tolu ne’e mak sei ba partisipa kompetisaun nasionál iha Dili hodi reprezenta Munisípiu Viqueque.

Nia hateten, ba loron ohin realiza kompetisaun lima, maibé tuir kritéria ne’ebé hosi komisaun nasionál ba komemorasaun loron konsulta populár  só permite de’it  grupu tolu ne’e mak sei ba partisipa iha Dili.

Moizes da Silva Monteiro hanesan manan na’in ba kompetisaun múzika rezisténsia espresa nia laran ksolok tanba bele hetan primeiru lugar iha kompetisaun nivel munisípiu.

“Ami sei prepara másimu hodi ba partisipa kompetisaun  tuir mai iha nivel nasionál,” afirma Xefe grupu manan na’in kompetisaun iha kategoria múzika rezisténsia nee.

Ba  kategoria kompetisaun hotu ne’ebé hetan primeiru lugar manan prémiu osan  $400, segundu lugar $200 no terseiru lugar $100.

 Jornalista : Nelson de Sousa

Editór       : Francisco Simões

 

HAKEREK NO HATÁN

Please enter your comment!
Please enter your name here