Koordenadór Jerál PFMO, Rui Denis. Imajen/Domingos Piedade Freitas

DILI, 05 agostu 2019 (TATOLI) – Jornalista timoroan hamutuk na’in 37 tuir formasaun rekolla dadus nian atu halo funsaun monitoriza no kontrola finansas públika Estadu nian.

Jornalista hirak ne’e mai hosi órgaun no meius komunikasaun oin-oin ne’ebé eziste iha Timor-Leste.

Rui Denis nu’udar Koordenadór Jerál PFMO hateten, Institutu Camões hetan finansiamentu hosi Uniaun Europeia, agora daudaun dezenvolve hela instituisaun estadu balun liuhosi entidade balun hodi haree kona ba supervizaun finansas publika.

“Ohin, hahú ona formasaun ba jornalista sira hodi kapasita sira liuliu kona ba reportajen jornalizmu ba dadus sira, hodi bele publika liuhosi televizaun, jornais, online no órgaun komunikasaun sosiál públikas no privadu para atu halo serbisu ho efikásia no integridade,” tenik nia ba ajénsia TATOLI, ohin, iha Otél Timor, Dili.

Nia hatutan, institutu Camões nu’udar parseria atu fó apoiu ba instituisaun timorense, ne’ebé halo funsaun monitoriza no kontrola supervizaun finansas públikas estadu nian.

Rui mós esplika katak programa ida nee mós hetan apoiu hosi instituisaun estadu mak hanesan Parlamentu Nasionál, Câmara de Contas, Prokuradoria Jerál Repúblika, Polisia Sientífika Investigasaun Kriminál (PSIK), Komisaun Anti Korrupsaun (KAK), Inspesaun Jerál Estadu ninian, inklui halo mós kapasitasaun ba non formal sira mak hanesan ONG, sosiedade sivíl no servisu auditoria sosiál.

Iha biban ida nee mós hakarak agradese tebes liuliu ba realizasaun formasaun nee, liuhosi apoia SECOMS, Konsultóriu  Lingua Portuguesa no sentru formasaun hosi Portugal ne’ebé hanaran Centro Protocolar de Formacão Profissional para Jornalistas (CENJOR) ho Formadóra  Ana Pinto Martinho, no durasaun ba kursu hamutuk oras 60.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here