Diretór DNTT, Natalino de Rosario. Imajen Egas Cristovão.

DILI, 05 agostu 2019 (TATOLI)- Diretór Nasionál Transporte no Terrestre (DNTT), Natalino do Rosário, hatete DNTT iha ona planu atu regula kontentór sira ne’ebé halo operasaun iha Dili laran, nune’e prevene engarrafamentu.

“DNNT sei haree hodi regula kontentór sira, nune’e prevene engarrafamentu ne’ebé sempre difikulta movimentu transporte sira”, Natalino dehan ba jornalista TATOLI iha nian knaar fatin Balidi, ohin.

Diretór ne’e dehan uluk iha ona regulamentu ne’ebé maka DNTT hasai hodi regula kontentór sira halo movimentu iha tempu kalan, maibé maioria motorista kompañia sira la konkorda tanba kestaun seguransa, tanba ne’e DNTT sei haree fali kestaun ne’e.

Nia salienta katak la’ós de’it haree ba movimentasaun ba karreta kontentór sira, maibé mós karreta sira ne’ebé maka tula lixu iha Dili laran.

“Karreta sira ne’ebé maka lalin fo’er DNTT sei regula hodi labele lalin lixu liuhusi Palásiu Governu, ida ne’e mós maneira ida tanba Palásiu Governu ne’e nu’udar edifísiu importante nasaun ne’e nian, nune’e presiza asegura nian imajen. Tanba dalaruma maluk sira ne’ebé lalin lixu, fo’er balun monu fali iha Palásiu nia oin, tanba ne’e maka bá oin DNTT sei hare kestaun sira ne’e”.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here