DILI, 05 agostu 2019 (TATOLI)-Diresaun Nasionál Servisu Água (DNSA) Munisípiu Dili, daudaun ne’e, kontinua halo manutensaun ba kanalizasaun bee moos iha área Ai-tarak Laran, Dili, hodi pinta hikas kanu tuan sira.
Ekipa Task Force hosi Diresaun Jerál Água no Saneamentu (DGAS) liuhosi Diresaun Nasionál Servisu Água (DNSA) hadi’a hikas ona liña transmisaun kanu bee-moos nian iha Benamauk, iha loron 02 agostu 2019. Nune’e, komunidade iha área Becora nian bele asesu hikas ona bee-moos hosi estasaun tratamentu Bee-moos Benamauk. Imajen/DNSA
“Ezemplu ba kanu ne’ebé mak fornese bee moos ba komunidade sira parte Ai-tarak Laran, kanu nia pintura komesa lakon ona, entaun ami hosi DNSA tenke pinta fali atu nune’e kanu hirak ne’e labele ko’ak,” informa Xefe Departamentu Abastesimentu no Bee Moos, Francisco Xavier Pereira, ohin, ba Ajénsia TATOLI, iha nia servisu fatin, Mascareñas, Dili.
Alende manutensaun iha área Ai-tarak Laran, ekipa tékniku DNSA mós sei halo monitorizasaun no manutensaun ba kanu tuan sira iha área seluk iha Dili laran.
“Ami husi diresaun Abastesimentu Água loron-loron halo manutensaun ba kanalizasaun bee moos, la’ós haree ba kanu tuan mak halo manutensaun, maibé ami mós haree ba kanu foun hirak ne’ebé mak monta tohar tanba kauza hosi udan no anin,” hateten Francisco Xavier Pereira.
Tuir lei konsumidór ida kada loron tenke konsume bee moos hosi litru 80 to’o litru 120, maibé daudaun ne’e bele atinje to’o litru 150 tanba ne’e afeta ba problema falta bee moos iha komunidade sira.
Jornalista : Osoria A. Marques
Editór : Francisco Simões
