DILI, 02 agostu 2019 (TATOLI)– Sekretáriu Estadu Protesaun Sivíl (SEPS), Alexandrino de Araújo, husu ba mediadór Diresaun Nasionál Prevensaun Konflitu Komunitária (DNPKK) na’in 39 atu ativu hala’o sira nia knar mediasaun nian no sosializa dame iha povu nia leet.
“Ita hakarak pontu fokál sira ne’e tenke proativu iha munisípiu no suku sira para sosializa dame. Nu’udar mediadór atu identifika problema para rezolve,” hateten Sekretáriu Estadu Alexandrino da Araújo, hafoin ensera treinamentu ba mediadór DNPKK na’in 39, ohin, iha Salaun Ministériu Interior, Vila-Verde, Dili.
Mediadór hirak ne’e mai hosi munisípiu 12, inklui Rejiaun Administrativu Espesiál Oe-Cusse Ambeno (RAEOA), remata ona formasaun kona-ba “Prevensaun no Rezolusaun Konflitu ho Perspetiva Jéneru” durante loron lima (5) hahú hosi 29 jullu to’o 02 agostu 2019.
Medidór na’in 39 ne’e tuir formasaun atu prepara sira nia aan no aprende matéria ho manan esperiénsia hosi fasilitadór sira atu sira bele servisu iha baze hodi halo mediasaun ba disputa sira ne’ebé mak akontese iha komunidade nia leet.
Materia formasaun ne’ebé sira hetan foka liu ba papél DNPKK, knaar tékniku informasaun no mediasaun, prevensaun konflitu, transformasaun konflitu, pratika mediasaun, negosiasaun, lei kontra violénsia doméstika, violénsia bazeia ba jéneru, formatu sinais konflitu, komunikasaun no prepara planu atividade.
Parte seluk, Amândio Pereira de Jesus nu’udar mediadór hosi Liquiça agradese ba fasilita formasaun ne’e hodi eleva liu tan sira nia koñesimentu no prepara mentalidade hodi hasoru komunidade sira iha baze.
Mediadór sira ne’e alende servisu ho PNTL, F-FDTL, autoridade suku, juventude, veteranu no komunidade, sira sei koopera mós ho konvensaun relijioza sira atu haree étika morál povu Timor-Leste nian.
Jornalista : Eugénio Pereira
Editór : Francisco Simões