Ministru Transporte no Komunikasaun, José Agostinho da Silva. Imajen/Egas Cristovão

DILI, 02 agustu 2019 (TATOLI)-Atividade inspesaun ne’ebé hala’o husi Ministru Transporte no Komunikasaun (MTKI),  José Agostinho da Silva, ohin, iha Aeroportu Nicolau Lobato, Dili, hetan katak mákina raiu-xís iha sala VIP (very important person) nian avaria.

Tuir Komisáriu iha Área Portuária husi Autoridade Nasionál Aviasaun Timor-Leste (ANATL) Eujebio da Costa Lopes, hatete raiu-xís ne’e aat iha jullu nia laran.

Tanba ne’e nia husu ba Ministru Agostinho atu halo karta ida ba iha Ministériu Turizmu, Komérsiu no Indústria (MTKI) ne’ebé mak iha mós raiu-xís hodi bele apoia provizória iha aeroportu.

“Ministru mós konkorda ona atu koordena direta ba Ministru Fidélis hodi bele oferese x-ray atu nune’e ami bele uza provizóriu”, nia informa hafoin akompaña Ministru José Agostinho da Silva halo inspesaun iha aeroportu Comoro, ohin.

Nia hatutan x-ray durante ne’e uza ba halo kontrolu sasán sira ne’ebé sai no tama iha sala VIP aeroportu Nicolau Lobato. Tanba ne’e husu ba ministru atu toma atensaun lalais hodi rezolve nune’e bele fasilita servisu iha aeroportu nian (liuliu iha sala VIP).

Ministru Transporte no Komunikasaun, José Agostinho da Silva, hatete nia parte sei manda karta ba iha MTKI hodi husu sira nian x-ray nune’e bele mai monta fali iha aeroportu atu fasilita funsionáriu sira.

“Hau manda karta ba Ministru ein ezersísiu Fidélis atubele oferese mákina x-ray rua ne’ebé free la uza, ne’ebé iha kondisaun di’ak mai monta fali hodi troka x-ray ne’ebé daudaun ne’e aat iha aeroportu”.

Nune’e bele fasilita atividade iha aeroportu tanba loron konsulta populár mós besik ona, nune’e bele fasilita di’ak liután bainaka sira.

Nia dehan parte ANATL rasik preokupa tanba mákina raiu-xís aat fulan ida ona no daudaun sira husu atu buka alternativa iha tempu besik.

“Ita tenke kria kondisaun ne’ebé di’ak hodi nune’e fó atendimentu ne’ebé di’ak ba bainaka sira”.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here