Atleta Kempo sira forma bainhira partisipa iha serimónia abertura Kampionatu Nasionál Kempo nian iha Jináziu Dili, 2 agostu 2019. Imajen Tatoli/Hortençio Sanchez

DILI, 2 agostu 2019 (TATOLI)—Federasaun Shorinji Kempo Timor-Leste (FSKTL), ohin, iha Jinájiu Dili, realiza Kampionatu Nasionál ba dala hitu (7)  ne’ebé partisipa hosi atleta hitunulu resin lima (75). Hosi atleta hirak ne’e, mane lima-nulu resin tolu (53) no feto rua-nulu resin tolu (23).

Atleta hirak ne’e mai hosi munisípiu lima (5) hanesan Dili, Ermera, Lautém, Bobonaro no Baucau.

Prezidente Komisaun Organizadora ba eventu refere, Leopoldo dos Santos, hateten eventu ne’e hala’o tanba hetan apoiu orsamentu hosi Sekretaria Estadu Juventude no Desportu (SEJD) ho montante rihun sanulu resin lima ($15.000).

“Eventu ida ne’e hanesan hasa’e esperiénsia ida ba atleta sira. Tinan-tinan ita realiza evente refere maibé tinan kotuk labele realiza tanba laiha apoiu orsamentu hosi Governu, maibé tinan ida ne’e ami agradese tanba apoiu hosi Governu maski ki’ik maibé di’ak,” dehan Leopoldo ba jornalista iha Zinájiu, Dili, ohin.

Nia esplika, bainhira atleta sira sai manán na’in iha eventu refere, primeiru lugár sei simu osan dolar atus-ida ($100), tasa no sertifikadu. Segundu lugár dolar hitu-nulu resin lima ($75), tasa no sertifikadu. Enkuantu, terseiru lugár osan dolar lima-nulu ($50) no sertifikadu.

“Kompete iha eventu ne’e mane hamutuk iha klase haat (4). Klase kilógrama haat-nulu resin lima (45) to’o kilógrama lima-nulu (50). Hosi kilógrama lima-nulu resin lima (55) to’o kilógrama neen-nulu (60) no kilógrama neen-nulu resin lima (65) to’o kilógrama hitu-nulu resin lima (75). Entretantu, ba feto nian iha klase tolu (3) maka hanesan klase kilógrama haat-nulu resin lima (45) to’o kilógrama haat-nulu resin ualu (48), kilógrama haat-nulu resin ualu (48) to’o kilógrama lima-nulu resin ida (51) no kilógrama lima-nulu resin ida (51) to’o kilógrama lima-nulu resin lima (55),” nia haktuir.

Leopoldo informa, seidauk iha hanoin atu hili atleta hirak ne’ebé mak prestasaun di’ak hodi partisipa iha eventu internasionál sira tanba FSKTL sei iha difikuldade ba orsamentu.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here