Prezidente Federasaun Futeból Timor -Leste (FFTL), Francisco Gerónimo. Imajen Tatoli/Egas Cristóvão

DILI, 1 Agostu 2019 (TATOLI) – Dadaun ne’e, mídia Indonézia halo espekulasaun maka’as hasoru jogadór Timor-Leste U-15, Paulo Gally Freitas, hodi deskonfia jogadór refere halo falsifikasaun ba sertidaun hodi muda tinan moris.

Tanba ne’e, Prezidente Federasaun Futeból Timor-Leste (FFTL), Francisco Gerónimo, hateten espekulasaun ne’ebé Indonézia halo hanesan funu psikolojia nune’e bele hamonu jogadór timoroan sira-nia mentalidade.

“Buat ne’ebé mak Indonézia halo ne’e hanesan funu psikolojia, tanba sira atu joga ho ita entaun sira tenke hatudu nune’e para bele hatuun mentalidade jogadór sira-nian tanba sira haree ita ne’e forte loos,” tenik Francisco Gerónimo ba TATOLI iha sede FFTL, Bairru Formosa, Dili, ohin.

Lider másimu FFTL ne’e esplika, bainhira tinan kotuk Paulo Gally hamutuk ho Selesaun Nasionál U-22 partisipa iha jogu Suzuki Cup bazeia ba deklarasaun hosi família no FFTL.

“Natón ita-nia Selesaun U-22 ba partisipa iha jogu Suzuki Cup, jogadór ne’e sei iha tinan 14 entaun Asian Federation Football (AFF) ko’alia mai ita, jogadór ne’e idade sei ki’ik ne’e imi hatama nia iha Selesaun Nasionál ne’e tanba saida. Se imi hatama duni nia, ami FIFA no AFF la bandu, maibé mosu buat ruma iha kampu laran imi tenke foti risku, entaun ami halo kedas deklarasaun,” nia splika.

Entretantu, bazeia ba regra FIFA nian, jogadór ho idade ki’ik bele joga hamutuk iha U-18 ba leten maibé tenke joga de’it iha minutu 30 mai kraik.

Prezidente ne’e hatutan, dadaun ne’e FFTL seidauk hetan xamada ruma hosi Association Football Confederation (AFC) no AFF relasiona ho kondenasaun ne’ebé Indonézia halo hasoru jogadór refere tanba buat hotu la’o loos hela.

“Ita haree, ema-nia sistema rejistu ba jogadór sira-nian ne’e liuhosi online. Se jogadór ne’e nia halo falsifikasaun, sinál ruma mosu iha ne’ebá. Jogadór ne’e nia inan rasik mai deklara labarik ne’e moris iha tinan 2004, entaun ne’e sala iha ne’ebé,” Francisco haktuir.

Fó hanoin fali, iha jogu AFF U-15, dadaun ne’e Timor – Leste tenke hakat ba semi finál hafoin impata ho Indonézia, horsehik (1-1).

Jornalista: Hortençio Sanchez

Editór: Xisto Freitas

1 KOMENTÁRIU

HAKEREK NO HATÁN

Please enter your comment!
Please enter your name here