Porkuradór Jerál Repúblika (PJR), Jose Ximenes, Imajen/Egas Cristovão

DILI, 30 jullu 2019 (TATOLI) – Prokuradór Jerál Repúblika (PJR), José da Costa Ximenes, hateten ema halo Timor-Leste sai hanesan fatin tránzitu droga, tanba sistema kontrolu mak sei fraku.

 ‘’Droga sira ne’e tama Timor-Leste hanesan tránzitu no destinasaun finál maka Indonézia. Agora konserteza ita lakohi ita nia rai loron ida nakfilak ba tránzitu droga, tanba saida mak sira utitiliza Timor-Leste sai hanesan fatin tránzitu entre ema ne’ebé importa mai Timor-Leste hafoin exporta, sira muda fila fali mai Dili tanba sistema kontrolu fraku, ne’e ita rekoñese”, dehan José da Costa bainhira aprezenta relatóriu anuál 2018 nian, ba Parlamentu Nasionál (PN), tersa ne’e.

Tuir nia, sidadaun Indonéziu sira halo ona peskiza durante tinan ualu nia laran katak antes ne’e tránzitu droga sira muda tiha husi Sumatera Utara, Batam ba Singapura, maibé agora ema hatene katak Timor-Leste nia sistema kontrolu fraku, tanba ne’e ema aproveita kondisaun.

 ‘’Ita-nia problema mak falla kontrolu, atu rezolve tenke hametin kontrolu husi polísia migrasaun sira ne’ e no 6 meses troka karik di’ak liu’’, PJR fó hanoin.

Nia dehan, oras ne’e ema Xinéz sira barak tebes iha Timor-Leste uza vistu turista, maibé hala’o fali atividade seluk.

José da Costa akresenta, rede droga sira la hamriik mesak, maibé hanesan rede ne’ebé metin, tanba ne’e parte seguransa iha fronteira sira presiza hametin kontrolu iha liña fronteira sira.

‘’Droga ninia finalidade mak brankamentu kapitál no  droga la’os krime ida ne’ebé hamriik mesak-mesak, tanba ne’e Timor-Leste ita tenke konsolida ita nia aan’’, nia katak.

PJR ko’alia kestaun droga tanba Deputadu Bankada KHUNTO, António Verdial preokupa tebes ho tránzitu droga iha Timor-Leste.

Jornalista: Evaristo Soares Martins

Editór: Xisto Freitas

 

HAKEREK NO HATÁN

Please enter your comment!
Please enter your name here