OÉ-CUSSE, 1 agostu 2019 (TATOLI)—Ekipa Tranzisaun hosi Governu Sentrál konklui ona avaliasaun iha Rejiaun Administrativa Espesiál Oé-Cusse Ambeno (RAEOA), kinta ne’e.
Iha loron ohin, ekipa hasoru malu ho Sekretária Rejionál Asuntu Agrikultura no Dezenvolvimentu Rurál, Sekretária Turizmu Komunitáriu inklui reprezentante hosi Sekretária Rejionál Sosiál no Saúde.
Hafoin enkontru, Xefe Ekipa Avaliasaun, Helder Lopez, hateten maski ohin konklui ona enkontru formál ho Sekretáriu Rejionál sira, maibé Ekipa Tranzisaun seidauk simu dokumentu nesesáriu sira hodi komprova informasaun ne’ebé sira hato’o durante enkontru.
Tanba ne’e, tuir kooperasaun no kolaborasaun ne’ebé iha, oras ne’e dokumentu sira iha hela prosesu kompilasaun no tempu badak sei entrega ba Ekipa Tranzisaun.
Iha fatin hanesan, Sekretáriu Rejionál ba Asuntu Ordenamentu Territóriu no Kadastru, Pedro de Sousa Xavier, haklaken Ekipa Avaliasaun husu de’it kona-ba serbisu ne’ebé pertense ba nia área, hanesan implementasaun projetu estrada hosi Sakato to’o Tono, oinsá atendimentu ba populasaun afetadu sira.
Nia hatutan, durante ne’e fó duni kompensasaun ba populasaun ne’ebé estrada kona lutu, planta, uma, bazeia ba deliberasaun ne’ebé autoridade aprova.
Maski la sita detalla uma hira mak afetadu no hetan kompensasaun, maibé Pedro informa katak selu mínimu liu $12 no másimu $5.000.
Pedro rekoñese durante ne’e mosu duni dezintendimentu iha prosesu maibé kona-ba dezenvolvimentu, ema hotu nia interese, tenke hasai duni.
Ajenda ba sesta (02/8), ekipa ne’e hamutuk ho Autoridade RAEOA sei halo vizita ba obra sira ne’ebé iha.
Tuir planu, ekipa sei fila hikas ba Dili iha sábadu no sei hasoru malu ho eis Prezidente RAEOA, Marí Alkatiri, atu konfirma informasaun sira ne’ebé iha ona antes finaliza no konklui hodi submete ba Primeiru-Ministru.
Jornalista: Cipriano Colo
Editór: Xisto Freitas
