Símbolu C12N

DILI, 30 jullu 2019 (TATOLI)-Komité 12 Novembru (C12N-sigla portugés) hato´o kongratulasaun ba Xefe Negosiadór Prinsipál, Kay Rala Xanana Gusmão ho nia ekipa tomak tanba kumpri misaun naruk iha negosiasaun naruk no todan kona-ba Timor-Leste nia Fronteira Marítima ho Austrália, no ikus mai iha akordu mós kona-ba Fronteira Terrestre ho Marítima ho Indonézia.

“Misaun ida ne´e hanesan Timor-Leste nia luta foun ida lideradu husi Kay Rala Xanana Gusmão hodi define delimitasaun fronteira sira nu’udar Estadu Soberanu, ne’ebé Timor Leste merese,” refere komunikadu imprensa TATOLI asesu husi C12N, tersa (30/07/2019).

C12N, bazea ba komunikadu ne´e, husu ba povu Timor-Leste tomak no Na´i ulun sira hotu kaer metin nafatin demokrasia, harmonia, unidade, estabilidade, paz no dezenvolvimentu. “Nu’udar povu Timor-Leste nia orgullu ba misaun lulik sira, husi luta naruk hodi hetan independénsia, luta naruk hodi hetan Delimitasaun Fronteiras, no kontinua luta nafatin ba povu tomak nia moris di’ak iha futuru”.

C12N mós husu ba prezidente promulga Tratadu Fronteira Marítima ho Alterasaun Lejislasaun ba atividade Petrolífera ne’ebé Parlamentu Nasionál aprovadu ona.

“Kaer metin ba povu Maubere nia interese no direitu lulik sira maka Comité 12 de Novembro ho respeitu husu ba Prezidente Repúblika hanesan prezidente ba povu tomak, atu promulga Tratadu Fronteira Marítima ho Alterasaun Lejislasaun ba atividade Petrolífera ne’ebé Parlamentu Nasionál aprova ona foin dadaun ne’e, tuir Konstituisaun Repúblika no léis sira hatete,” C12 husu tan.

Entretantu, C12 ne´e hanesan organizasaun ne´ebé halibur kombatente libertasaun nasionál no veteranu sira ne´ebé uluk nu´udar Lorico Aswa´in fó lisuk ona kontribuisaun ba funu libertasaun nasionál.

Hanesan organizasaun símbolu unidade nasionál ne´ebé halibur mate restu sira hotu husi Masakre 12 Novembru 1991.

Jornalista : Nelia Fernandes

Editór       : Rafy Belo

HAKEREK NO HATÁN

Please enter your comment!
Please enter your name here