Ministru Estadu Prezidénsia Konsellu Ministrus, Hermenegildo Augusto Cabral Pereira. Imajen/Egas Cristovão

DILI, 31 jullu 2019 (TATOLI) –Governu liuhosi reuniaun Konsellu Ministru (KM) ne’ebé prezide hosi Primeiru-Ministru (PM), Taur Matan Ruak, ohin, iha Palásiu Governu,  aprova proposta deliberasaun kona-ba akordu kooperasaun (MoU-sigla inglés)  Alfandegária entre Timor-Leste ho Repúblika Indonézia.

Proposta deliberasaun ne’e  aprezenta hosi Ministra Finansas ein-funsaun, Sara Lobo Brites, hodi bele presta kooperasaun entre TL-RI oinsá haforsa malu no transforma koñesimentu ba malu iha area servisu alfándega nian.

Ministru Estadu Prezidénsia Konsellu Ministru, Hermenegildo Augusto Cabral Pereira,  relata katak, MoU ida nee atu promove kooperasaun entre nasaun rua nee hodi troka informasaun no fahe koñesimentu ba luta efetiva kontra krime, espesiál ba krime transnational no tráfiku ba sasán ilísitu sira.

“Ministériu Finansas sei asina ho nia omólogu Ministériu  Finansa Indonézia nian iha ámbitu komersiál, fasilitasaun, atividade ekonómika ne’ebé mak KM aprova ona MoU nee,” informa Ministru  Agio Pereira liuhosi konferénsia imprensa.

Nia hatutan, MoU nee mós prevee komponente hosi dezenvolvimentu institusionál ba atividade edukasaun no formasaun. KM fó podér tomak ba Diretór Jerál Autoridade Aduaneira, José António Fatima Abílio atu realiza asinatura ba memorandu nee.

Iha biban hanesan Ministra Finansa, Sara Brites Lobo hateten, ohin mós KM fó plenus poderes ba alfándega hodi asina akordu ida ho alfándega Indonesia, kona ba troka informasaun no mós apoiu formasaun ba alfándega TL no Indonesia hodi fó apoiu ba malu.

Hatán kona ba akordu rua nee, bainhira mak aselera Ministra Finansa nee resposta katak depois hetan tiha plenus podores  sei deside nia ajenda liuhosi Diretór Jerál Alfándega hosi TL no Indonesia, maibé seidauk hatene didi’ak data serteza.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here