Primeiru-Ministru, Taur Matan Ruak, prezide reuniaun Konsellu Ministru iha Palásiu Governu, Dili, Kuarta (31/07/2019). Imajen/Egas Cristovão

DILI, 31 jullu 2019 (TATOLI)-Governu liuhusi reuniaun Konsellu-ministru (KM) aprova ona tetu fiskál no prioridade nasionál sira ne’ebé sei prevee iha Orsamentu Jerál Estadu (OJE) 2020 ho montante 1.6 biliaun ba prioridade tolu.

Área tolu ne’ebé sai foku governu da-ualu mak dezenvolvimentu kapitál sosiál, ne’ebé haree liu ba edukasaun no formasaun, saúde no fornesimentu bee-moos no infraestrutura saneamentu báziku nian sira.

Dezenvolvimentu ekonómiku ne’ebé haree liu ba insentivu ba investimentu setór privadu nian, kriasaun empregu, diversifikasaun ekonómika no dezenvolvimentu setór agrikultura, aumentu konetividade nasionál ho dezenvolvimentu portu, aeroportu, estrada rurál no estrada urbana sira no dezenvolvimentu lojístika nasionál ho kriasaun infraestrutura prosesamentu no armazenamentu nian sira no ho hadi’a transporte tasik (marítima), rai-maran (terrestre) no aéreu sira

Governu mós hanoin ona atu sosa tan ró tolu para ajuda no tulun transportasaun materiál ba munisípiu sira liuhusi tasi, nune’e labele lori impaktu ba estrada sira iha territóriu Timor-Leste.

Ministru Estadu no Prezidente Konsellu Ministru, Hermenegildo Augusto Cabral Pereira, ba jornalista sira hafoin enkontru hatete Primeiru-Ministru hanoin atu ajuda mós eskola sira iha territóriu laran tomak.

Tan ne’e, nia dehan OJE 2020 ne’e mós sei tau prioridade ba Ministériu Edukasaun para realiza tan konstrusaun ka reabilitasaun ba sala aprendizajen hamutuk 400 resin iha munisípiu sira.

Agio haktuir projetu boot seluk ne’ebé mós sai prioridade maka hari eskola tékniku vokasionál ho ekipamentu kompletu para ajuda timoroan sira hetan formasaun ida adekuadu atu asesu ba merkadu traballu ne’ebé timoroan sira sei hasoru iha futuru.

Portantu proposta tetu ne’e sei aprezenta ba Parlamentu Nasionál antes loron 15 outubru 2019, tuir kalendáriu OJE 2020 ne’ebé aprova. Nune’e, diskusaun, votasaun no promulgasaun sei akontese dezembru tinan ne’e.

Tuir dokumentu ne’ebé TATOLI asesu hosi portál governu esplika valór totál OJE tinan 2020, porsentu 30 sei aloka ba setór sosiál, porsentu neen aumentu iha edukasaun kompara ho OJE tinan 2019 no porsentu 19 OJE tinan 2018 nian.

Montante ba protesaun sosiál sei aumenta porsentu ida kompara ho montante 2019 no porsentu sia kompara ho tinan 2018 nian.

Orsamentu ba setór saúde sei aumenta porsentu 39 kompara ho tinan anteriór, aumentu iha orsamentu ba Ministériu Saúde hamutuk porsentu sia no porsentu 12 kompara ho orsamentu tinan 2019 no tinan 2018.

Setór ekonómiku no infraestrutura sei reprezenta porsentu 41 husi totál OJE tinan 2020 nian, ho dolar milliaun 654 maka sei aloka ba setór ekonómiku sira no milliaun 13,5 ba dezenvolvimentu infraestrutura bee no saneamentu.

Orsamentu ba Ministériu Agrikultura no Peskas sei iha aumentu porsentu 29 kompara ho orsamentu tinan 2019.

Jornalista : Tomé Amado  

Editór       : Rafy Belo 

HAKEREK NO HATÁN

Please enter your comment!
Please enter your name here