Negosiadór Prinsipál, Xanana Gusmão, bainhira aprezenta alterasaun Lei Haat iha Parlamentu Nasionál. Imajen dok. Tatoli

DILI, 30 jullu 2019 (TATOLI)—Relasiona ho Parlamentu Australianu Ratifika ona Tratadu Fronteira Marítima entre Timor-Leste no Austrália iha segunda (29/7), Parlamentu Nasionál (PN) agradese ba inisiativa ne’e.

Deputadu Bankada CNRT, Patrocino Fernandes de Carvalho, hateten nia parte hetan ona informasaun katak Parlamentu Australianu Ratifika ona Tratadu Fronteira Marítima, inklui pakote lejizlativa hamutuk 25.

“Lori bankada CNRT, agradese ba Parlamentu Austrália ne’ebé ratifika ona horisehik. Obrigadu mós ba povu Australianu, tanba rai rua iha fronteira marítima definitiva,” dehan deputadu Patrocino liuhosi plenária, tersa ne’e.

Iha fatin hanesan, Deputadu Bankada PLP, Abel Pires espresa nia sentimentu orgullu tanba Austrália konsege konklui ona lejizlasaun ba Tratadu Fronteira Marítima.

“Bankada PLP hakarak hato’o agradesimentu boot ba Austrália, ne’ebé ratifika ona tratadu ne’ebé asina iha 6 marsu 2018,” katak deputadu Abel Pires.

Nune’e mós, Deputadu Bankada KHUNTO, António Verdial, informa Parlamentu rai rua halo ona ratifikasaun no hein de’it troka nota iha 30 agostu, tinan ida ne’e.

“Lori bankada KHUNTO nia naran, hato’o agradesimentu wa’in ba Parlamentu Australianu ne’ebé ratifika ona tratadu,” António hateten.

Entretantu, liuhosi deklarasaun hosi Governu Australianu horsehik katak ratifikasaun ne’e estabelese tratadu permanente ba Fronteira Marítima entre nasaun Timor-Leste no Austrália no estrutura legál atu dezenvolve gás no mina iha Tasi Timor.

Ratifikasaun tratadu ne’e estabelese regra internasionál sira no komprimentu pasífiku ne’ebé reflete apoiu tomak ba independénsia, soberania no sustentabilidade ekolójika Timor-Leste.

Nune’e, ho aprovasaun lejizlasaun ba implementasaun tratadu ne’e, Austrália prontu halo parseria ho Timor-Leste atu dezenvolve hamutuk kampu gás Greater Sunrise para benefísia nasaun rua.

Enkuantu, Parlamentu Timor-Leste aprova ona pakote lejizlativa ne’ebé kompostu hosi rezolusaun ba ratifikasaun fronteira marítima no proposta lei haat. Pakote lejizlativa ne’e haruka ona ba Prezidente Repúblika, Francisco Guterres ‘Lú Olo’.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here