DILI, 30 jullu 2019 (TATOLI)-Atu asegura ambiente moos iha sidade Dili hodi komemora tinan 20 loron konsulta popular (30 Agostu 1999-30 Agostu 2019), Autoridade Munisípiu Dili liuhosi jestaun merkadu fó  orientasaun ba negosiante fa’an nu-laloir sira atu monta tenda provizóriu.

Observasaun Ajénsia TATOLI iha area Largo Lecidere nian hatudu katak, negosiante nu-laloir kuaze rua nulu monta ona tenda provizóriu hodi fa’an sira ninia produtu hanesan nu-laloir.

Rosário Pereira, nu’udar negosiante nu-laloir  hateten, nia prontu kontribui ba Dili ambiente moos atu muda sai hosi fatin ne’ebá no prontu nafatin kolabora ho autoridade Munisípiu Dili ho Polisia Nasionál Timor-Leste .

“Ami simu autorizasaun hosi autoridade Munisipál Dili hamutuk ho PNTL no autoridade komunitária mak haruka ami fa’an iha fatin ne’e,” hateten Agostinho Rosário Pereira.

Nia dehan, atividade fa’an nu-laloir nee re-ativa fali durante loron haat ona maske antes ne’e governu liuhosi autoridade Munisípiu no PNTL bandu ona atu halo negósiu iha fatin públiku.

Agostinho nia maluk negosiante Armindo Gama mós espresa nia laran ksolok ho atendimentu Governu nian ne’ebé oferese fatin no tenda ba sira atu kontinua hala’o sira nia negósiu maske provizóriu.

 “Ami fa’an iha ne’e, tuir orientasaun hosi autoridade Munisipál Dili no PNTL, maibé ami seidauk hatene katak fa’an temporáriu ka permanente iha fatin ne’e,” hateten Armindo Gama.

Jornalista : Osória A. Marques

Editór       : Francisco Simões

HAKEREK NO HATÁN

Please enter your comment!
Please enter your name here