Ministériu Saúde (MS) liuhusi Departamentu Saúde Ambiente, ohin, fó orientasaun ba jestór ótel no restaurante sira iha Kapitál Dili kona-ba ai-han seguru. Foto TATOLI: Felicidade Ximenes

DILI, 30 jullu 2019 (TATOLI)—Ministériu Saúde (MS) liuhusi Departamentu Saúde Ambiente, ohin, fó orientasaun ba jestór ótel no restaurante sira iha Kapitál Dili kona-ba ai-han seguru bazeia ba xave 5 hodi hasa’e kuñesimentu ba sira ne’ebé fornese hahan ba públiku.

Orientasaun ne’e hala’o relasiona ho komemorasaun Konsulta Populár ba dala-20 (30 Agostu 1999-30 Agostu 2019) mak husi serbisu saúde mundiál Dili husu responsabilidade ba jestór sira-nia serbisu tuir kritéria saúde atu bele asegura saúde produtivu ba iha komunidade.

Relasiona ho komemorasaun Konsulta Populár ba dala-20 mak husi serbisu saúde mundiál, Dili fó orientasaun xave 5 ai-han seguru ba jestór ótel no restaurante sira iha Dili laran nian iha Administrasaun Munisipál Dili.

“Xave 5 iha fatór importante mak, primeiru, prepara hahan ne’ebé mak moos. Segundu, separasaun ba hahan tasak no matak. Terseiru, kondisaun saneamentu ne’ebé di’ak. Kuartu, bele rai hahan iha temperatura ne’ebé mak tuir kritéria saúde nian ho temperatura ne’ebé mak loos. Kintu,  utiliza bee ne’ebé mak seguru no hili hahan ne’ebé mak fresku no hahan sira ne’e lalika liu prazu,” dehan Xefe Departamentu Saúude Ambiente iha Minstériu Saúde, José Moniz, ba jornalista sira, tersa (30/7/2029).

Nia hatutan, preparasaun ba komemorasaun Konsulta Populár iha Timor-Leste ne’ebé ita sei konvida na’in ulun sira husi nasaun lubuk ida no mós ita-nia vizitór sira. Iha ne’e, Ministériu Saúde halo preparasaun haree liu ba fatin públiku hanesan ótel no restaurante sira-nia fatin liliu iha relasaun ho prepara hahan ne’ebé moos no higiene.

Provizoriamente, nia haktuir, husi parte Ministériu Saúde identifika ótel 20 ho apartamentu iha Sidade Dili. Husi ótel no apartamentu sira ne’ebé identifikadu ona, nia dehan, iha balun ne’ebé selesionadu ona para ita-nia vizitór sira mai hela iha fatin refere.

“Husi parte saúde nian mak ami aprezenta ótel no restaurante sira tuir kritéria saúde nian nomós fatin prepara hahan tuir kritériu. Bainhira sira la tuir kritériu, rekomenda para labele atende vizitór sira. Ida ne’e mak ami hala’o durante ne’e no ohin loron ami fó orientasaun ba sira para sira prepara di’ak liután,” nia dehan.

Entretantu, iha fatin hanesan, reprezentante Empreza Hotel Timor, José Mariano, hateten Hotel Timor preparadu ona no simu pedidu rezerva ba eventu Konsulta Populár ba dala-20 (30 Agostu 1999-30 Agostu 2019).

“Ha’u sei ba aprezenta ba ami-nia manajer (jestór) ho xefe informasaun kona-ba ohin loron ne’ebé simu orientasaun ai-han seguru no xave 5 hodi hato’o ba ha’u-nia traballadór sira hodi hala’o. Ita hotu, parte husi saúde nian, Munisípiu Dili, ótel no restaurante sira, ita kolabora hamutuk hodi simu vizitór sira ne’ebé atu mai,” nia dehan.

Jornalista: Felicidade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here