Rate bebé deskoñesidu ne'ebé hakoi iha Semitériu Cacaulidun, Dili. Imajen/Scos Viera

DILI, 29 jullu 2019 (TATOLI)-Dezde tinan 2006 to’o mai 2019, Ministériu Solidariedade Sosiál no Inkluzaun         (MSSI) halo’ot mate isin  deskoñesidu hamutuk na’in 25 ne’ebé maka família la konsege  identifika tanba kauza  hosi kazu omisídiu no abortu.

Diretór Nasionál Asisténsia Sosiál (DNAS-MSSI), Mateus da Silva, informa, mate isin hirak ne’e kompostu hosi bebé to’o ema boot. Mezmu nune’e, Diretór Mateus da Silva, la esplika detallu kona-ba identidade sexu  feto hira no mane hira.

“Mate isin deskoñesidu hirak  ne’e, ami hakoi iha Semitériu Cacaulidun ho Becúse, Dili,” informa Diretór Mateus da Silva ba ajénsia Tatoli, ohin, iha Semitériu Becúse, Dili.

Nia informa tan, antes halo’ot mate isin ne’ebé kategoria deskoñesidu, DNAS-MSSI tenke hetan autorizasaun hosi diresaun forensik Ospitál Nasionál Guido Valadares (HNGV-sigla Portugés).

“Hanesan apoiu orsamentu, ne’e kada mate isin bele to’o $500 nune’e hodi sosa kaixaun, rai-henek, blok, simente no selu ema badaen ke’e rai kuak no hada blok hosi rai laran hodi halo’ot mate isin,” hateten Mateus da Silva.

Jornalista          : Nelson de Sousa

Editór                : Francisco Simões

HAKEREK NO HATÁN

Please enter your comment!
Please enter your name here