Kontra-atake entre jogadór Ponta Leste no Ultramar. Imajen Mídia LFA

DILI, 28 jullu 2019 (TATOLI)—Ekipa Ponta Leste halakon Atlético Ultramar ho rezultadu golu 2-1 liuhusi jogu kontinuasaun Primeira Divizaun Liga Futeból Amadora (LFA) époka 2019 ne’ebé hala’o iha Estádiu Munísipal Dili, ohin.

Vitória ne’ebé Ponta Leste gaña lori ekipa refere provizóriamente ukun tabela klasifikasaun ho pontu 15. Entretantu, Ultramar mantein nafatin iha zona seguru ho pontu 8.

Golu Ponta Leste marka hosi jogadór estranjeiru, Daniel Donkor (20) iha minutu 30 no Silveiro Garcia iha minutu 78. Golu úniku Ultramar nian prodúz hosi Fábio Christian Cutinho iha minutu 16.

Jogu refere dirije hosi árbitru Pedro Carvalho, juiz liña Romário Malitety, Gerónimo dos Santos no árbitru rezerva, Salvador Cabral.

Maski lakon, ho fuan boot, Treinadór Ultramar, Gaspar Pinto konfesa katak kondisaun ultramar nian mak nune’e maibé ba oin nia koko ko’alia ho jestór klube para bele hadi’a di’ak liu-tan ekipa refere.

“Ohin ami lakon maibé joga di’ak. Ami esforsu atu manán maibé tanba Ponta Leste iha estratéjia di’ak entaun sira mak manán,” dehan Gaspar.

Iha sorin seluk, Treinadór Ponta Leste, Eduardo Pereira ba Agência Tatoli, hateten jogu difísil maibé nia koko halo estratéjia ne’ebé di’ak mak foin manán iha segunda parte.

“Ohin iha primeira parte ha’u monta estratéjia maibé la kona alvu. Iha segunda parte, ha’u muda estratéjia foin mak hetan rezultadu ka manán duni,” tenik Eduardo.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here