Jogadór brazileiru rua, Fábio Christian Cutinho (liman loos) no Glaco Trajano (liman karuk). Imajen Mídia LFA

DILI, 28 jullu 2019 (TATOLI)Ami mai la’ós buka de’it osan. Ami mai atu lori esperiénsia natón fahe ba imi durante tinan tolu hamutuk ho imi. Imi konsege hadau duni esperiénsia balun hosi ami. Ida ne’e mak ami-nia hakarak. Ami hakarak Timor-Leste nia ema sira sai jogadór hanesan brazileiru.

Hakat ida ba oin, lais ka neik, sei kuda hela ain le’ut iha kotuk ne’ebá. Hanesan espresaun mihis iha leten, buat wa’in be akontese iha pasadu, hela de’it ona iha memória. Hela de’it ona iha imajinasaun. Bele iha forsa rejeita ne’e maka’as, ida ne’ebé atu mai sei mai duni. Bele forsa vizilánsia ne’e  iha beran, ida ne’ebé atu ba sei ba duni.

Ba tebes duni. Buat hotu tempu mak hahú no tempu maka hakotu. Tanba tempu maka na’in ba determinasaun, lori  jogadór brazileiru rua tenke desidi fahe malu ho nia klube ne’ebé haki’ak sira sai boot iha Timor. Maski ne’e todan no todan tebes, ne’e maka desizaun.

La seluk no la leet, jogadór rua ne’e mak Fábio Christian Cutinho (10) no Glaco Trajano (4). Hanesan jogadór, sira na’in rua nia misaun la’ós kumpri de’it kontratu ne’ebé Atlético Ultramar prega ba sira. Sira na’in rua hala’o mós serbisu extra. Serbisu voluntáriu.

Durante tinan tolu reforsa ekipa ne’ebé idéntiku ho ‘Balisaun’ ne’e, ho inisiativa rasik, sira rua hanorin jogadór lokál hosi Manatuto oinsá kaer bola no oinsá husik bola atu fó impaktu ba ekipa durante jogu minutu 90 iha kampu. Sira rua nia liman rohan hahoris rezultadu. Ohin loron, jogadór lokál sira iha Manatuto joga ho arte tebes. Bele joga ho tiki-taka. Bele mós joga ho samba ka lori bola ho dansa.

“Ami mai la’ós buka de’it osan. Ami mai atu lori esperiénsia natón fahe ba imi durante tinan tolu hamutuk ho imi. Imi konsege hadau duni esperiénsia balun hosi ami. Ida ne’e mak ami-nia hakarak. Ami hakarak Timor-Leste nia ema sira sai jogadór hanesan brazileiru,” dehan Christian Cutinho (10) ba Agência Tatoli iha Estádiu Munisipál Dili, domingu ne’e.

Iha soru-mutu nia rohan, la sees hosi tristeza. Tanba ne’e, sira rua la’ós triste de’it maibé tenke fakar matan-ween. Estádiu Dili sai sasin ba neon triste ne’e. Joga kontra Ponta Leste iha domingu ne’ebá, sai hanesan jogu ikus ba sira rua hamutuk ho Ultramar.

“Ha’u uluk kedas lakohi husik Ultramar maibé ohin ami husik Ultramar. Ida ne’e hanesan triste boot ida mai ami. Durante tinan tolu ha’u hamutuk ho Ultramar, ne’e la’ós fásil. Ha’u hasoru difikuldade barak. Maibé, ohin, hakarak lakohi ami tenke husik Ultramar hodi hamutuk fali ho Lalenok United FC,” nia haklaken.

Durante viajen hamutuk ho Ultramar, sira rua halo rai nia naran. Hatuur Ultramar iha leten aas. Lori sira rua nia kbiit hamutuk ho jogadór timoroan sira, konsege dudu Ultramar hosi Segunda Divizaun ba Primeira Divizaun iha 2016. Lori mós Ultramar sai kampiaun ba Tasa 12 Novembru époka rua tutuir malu.

“Ha’u hadomi Ultramar. Obrigadu barak ba di’ak tomak ne’ebé durante ne’e Prezidente Altético Ultramar,  Ano Gusmão, haraik mai ami. Ami sai ona família ba Timor -Leste,” dehan Christian.

Entretantu, Glaco Trajano hateten nia hadomi tebes Ultramar.  “Ohin ne’e difísil loos mai ha’u-nia hanoin. Ha’u hadomi Ultramar. Ultramar sai ona família ba ha’u,” tenik Glaco.

Nia husu ba jogadór lokál Ultramar sira hotu atu badinas treinu no hatudu nafatin mentalidade jogu ne’ebé di’ak nune’e bele lori Ultramar ba oin ho di’ak liu-tan.

Jogadór rua nia despedida, afeta jogadór timoroan nia sentimentu. Jogadór Ultramar, Rafael Carvalho (8) sente triste maibé ida ne’e mak realidade.

“Ami apriende matenek kona-ba maneira joga nian barak hosi sira. Ami bele mesak maibé ami prontu lori Ultramar ba oin,” katak Rafael.

Despedida dalaruma labele akontese hikas no dalaruma mós bele akontese hikas. Hanesan jogadór brazileiru rua ne’e nia viajen. Maski husik ona Ultramar, maibé saudade. Sira rua prometidu, bainhira termina sira-nia kontratu iha Lalenok, hakarak fila hikas mai Ultramar tanba Ultramar iha ona sira-nia fuan.

“Esperiénsia ami husik hela ona ba imi. Ami hamutuk ho imi tinan tolu. Imi konsege apriende ho di’ak. Adeus! Loron ida ami sei fila fali,” Glaco dehan ho matan-ween be nakonu.

Jornalista: Hortençio Sanchez

Editór: Xisto Freitas

1 KOMENTÁRIU

  1. Ami nx jogo n liga la iha responsabilade Liu MK Ami ultramar n Mesa MZ la berani atu foti desizaun n club selu hlo n Mesa Haruka joga MZ Ami n fali Sira fo ba Ema menan LFA simu Osan husi kotuk krk .n MK iha desizaun n

HAKEREK NO HATÁN

Please enter your comment!
Please enter your name here