Logo BCTL

DILI, 25 jullu 2019 (TATOLI)-Banku Sentrál Timor-Leste (BSTL) lansa ona Sistema Garantia Kréditu ba empreza ki’ik no média no prontu ona atu simu pedidu aplikasaun ba kréditu ne’e.

Programa ne’e jere husi BSTL no implementa husi instituisaun kréditu iha Timor-Leste no daudaun ne’e só Banku Nasionál Komérsiu Timor-Leste (BNCTL, sigla portugés) mak partisipa hanesan kredór (fó kréditu).

Governadór BSTL, Abraão de Vasconcelos, iha lansamentu horisehik, fó sai katak Sistema Garantia Kréditu agora operasionál totalmente.

“Banku Sentrál dezenvolve ona sistema online ne’ebé prosesu hotu dijitalizadu”, refere komunikadu ne’ebé Tatoli asesu, ohin.

Programa Sistema Garantia Kréditu ne’e atu promove empreza ki’ik no média iha Timor-Leste ho fasilita sira ba asesu finanseira.

Iha programa ne’e, risku kréditu iha empréstimu ba empreza ki’ik no média sei fahe entre fó empréstimu no Sistema Garantia.

Iha faze inísiu, programa Garantia Kréditu sei fó benefísiu ba empreza ki’ik no média, ho rejistu empregadu husi 6 to’o 50, na’in ema timoroan, ne’ebé opera iha área agrikultura, turizmu, indústria manufatureira no transporte.

Aléinde ne’e, kréditu só ba projetu ekonomia viavel ne’ebé prienxe ba Sistema Garantia Kréditu. Empreza ki’ik no média ne’ebé interese hodi kandidata-aan ba sistema ne’e kontaktu ho BNCTL no fó pedidu ba empréstimu. BNCTL sei halo avaliasaun kréditu, no solisita garantia ba BSTL.

Antes ne’e Prezidente BNCTL, Brígido de Sousa, deklara ona katak BNCTL mak banku dahuluk ne’ebé hakarak partisipa iha Sistema Garantia Kréditu ne’e. “Osan ne’e prevee iha Orsamentu Jerál Estadu tinan 2017, millaun haat, ne’e atu sai eskema garantia de’it ne’ebé banku sentrál mak jere no banku seluk hakarak, bele partisipa”.

Brígido dehan, daudaun ne’e iha ona empreza balu maka hatama proposta hodi aplika ba eskema garantia kréditu ne’e.

Notísia relevante : Eskema Garantia Kréditu Seidauk Implementa Tanba BCTL Sei Prepara Regulamentu

Jornalista : Maria Auxiliadora

Editór        : Rafy Belo

HAKEREK NO HATÁN

Please enter your comment!
Please enter your name here