Komandante Operasaun Nasionál, Superintente Xefe Pedro Belo, ho Tenente Koronél F-FDTL, Cesario Marçal Ximenes "Haksolok", hamoos liafuan la edukativu iha Kampu Comoro, Dili, sesta (26/07/2019).Imajen/Eugénio Pereira

DILI, 26 jullu 2019 (TATOLI)-Governu liuhosi Sekretáriu Estadu Juventude Desportu, Komisaun Regulariza Arte Marsiál (KRAM) hamutuk ho Komandu Polisia Nasionál Timor-Leste no FALINTIL-Forsa Defeza Timor-Leste (F-FDTL) no autoridade Suku Komoro, Madohi, Bebonuk no Manleuana, ohin, lansa programa  “Dili Livre Husi Publisidade La Edukativu, Moos no Seguru”.

Tenente Koronél F-FDTL, Cesario Marçal Ximenes “Haksolok”, ho Komandante Operasaun Nasionál, Superintendete Xefe Pedro Belo, Prezidente Autoridade Munisípiu Dili, Gaspar Soares , lansa “Dili Livre Husi Publisidade La Edukativu, Moos no Seguru” iha” Kampu Comoro Dili, sesta (26/07/2019).Imajen/Eugénio Pereira

Programa ne’e lansa direita hosi, Sekretáriu Estadu Juventude no Desportu (SEJD), Nelio Isaac Sarmento, Tenente Koronél F-FDTL, Cesario Marçal Ximenes “Haksolok”, Komandante Komandu Operasaun Nasionál (KKON), Superintendente Xefe Pedro Belo, Prezidente Autoridade Munisípiu Dili, Gaspar Soares, inklui autoridade suku ne’ebé hala’o iha Kampu Futeból Comoro, Dili.

Ekipa sira ne’ebé envolve iha programa ne’e sei tuun direita ba estrada públiku hodi  hamoos símbolu grupu ilegál no liafuan la edukativu ne’ebé marka iha parede sira.

Sekretáriu Estadu Nelio  Isaac dehan, governu no KRAM rasik preokupa ezisténsia grupu ilegál kontinua kria violénsia  no krime iha rai laran. Tanba ne’e governu apoia polítika hodi hamoos liafuan la edukativu atu evita problema iha rai laran.

“Ita hamutuk iha ne’e hanesan aktu preventiva ba tuir lei númeru. 5/2017 kona-ba Arma Branka no Arte Marsiál nian ne’ebé Estadu toka ona,” hateten  Nelio Isaac iha nia diskursu.

Nelio afirma, presiza duni hamoos hotu tiha lia fuan la edukativu no dezeñu sira ne’ebé la kontribui ba unidade nasionál.

Biban ne’e, Tenente Koronél F-FDTL, Cesario Marçal  Ximenes “Haksolok”, apela ba joven sira liu –liu grupu ilegál sira atu tuur hakmatek no labele kria konflitu oho malu, tanba F-FDTL no PNTL simu on orden halo operasaun ho rigorozu.

Tenente Haksolok, sente triste no la haksolok ho situasaun krime ne’ebé kontinua akontese sunu uma, oho malu ne’ebé envolve husi grupu ilegál sira.

“F-FDTL treinu para atu tiru, ne’ebé agora atu tiru (kartús) ne’e ba se? Ne’e ita sei identifika. Ha’u husu ba joven sira labele abuza, ita ukun aan dala ida, tanba tinan 24 ami terus defende duni ukun aan atu iha dame,” afirma Komandante Haksolok.

Haree ba krime ne’ebé akontese, Komandu F-FDTL no PNTL deside ona atu haree kestaun Direitu Umanu ba ema ne’ebé halo krime tau lai kotuk,  hodi fó podér ba forsa atu situasaun ho forsa.

“Kuandu halo nafatin krime, direitu umanus ne’e PNTL no F-FDTL sei viola, tanba Señor Jenerál Lere ko’alia beibeik ona direitu umanu iha para atu defende ema no respeita ba komunidade, agora ba ema krime la iha direitu umanu,”  haktuir Haksolok.

Iha fatin hanesan, Komandante Komandu Operasaun Nasionál (KKON), Superintendente Xefe Pedro Belo dehan, programa hamoos liafuan la edukativu hola parte mós iha programa operasaun konjunta F-FDTL no PNTL tuir orientasaun  Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timur, no Komandante Jerál PNTL, Komisáriu Faustino da Costa, hodi buka tuir grupu ilegál sira ne’ebé kontinua kria violénsia iha Timór.

Pedro dehan, limpeza hamoos símbolu grupu ilegál nu’udar parte implementa hodi garantia seguransa iha Timór. Maibé, forsa rua sei halo mós operasaun fíziku ba grupu ilegál sira ne’ebé sei kontinua treinu iha foho lolon no treinu subar iha uma lelet sira.

PNTL no F-FDTL sei halo operasaun tama bairru sira ne’ebé identifika ona grupu ilegál sei treinu subar sei kaer hotu.

Pedro Belo husu ba Konsellu Polisiamentu Komunitária (KPK), Ofisial Polisia Suku (OPS), xefe suku, konsellu suku no juventude sira atu koopera ho forsa rua halo operasaun.

“Sira treinu iha fatin ne’ebé de’it hatudu para ita buka tuir sira, la iha tan iha nasaun ne’e grupu ilegál mak atu ukun fali, tanba F-FDTL no PNTL mak kontrola situasaun iha rai laran,” afirma Pedro Belo.

Nia hatutan, karik funsionáriu públiku, membru F-FDTL no PNTL envolve iha grupu ilegál tenke hato’o keixa ba forsa rua hodi halo atuasaun kastigu ou demite  hosi servisu.

Komandu F-FDTL no PNTL husu mós ba povu sira karik haree liafuan la edukativu hakerek iha sira nia uma oin ka bairru tenke hamoos hodi kontribui mós ba estabilidade atu iha dame.

Ikus liu Prezidente Autoridade Munisipiu Dili, Gaspar Soares apresia programa limpeza ne’e partisipa direta hosi forsa rua inklui autoridade suku, KPK, OPS no lider komunitáriu sira.

Atu selebra loron konsulta popular ba dala 20 (30 Agostu 1999-30 Agostu 2019), autoridade Dili mós hasai ona karta ba suku hotu Dili koopera ho forsa rua halo limpeza iha suku hotu-hotu hodi simu festa konsulta populár ho ambiente moos.

Jornalista          : Eugénio Pereira

Editór                : Francisco Simões

HAKEREK NO HATÁN

Please enter your comment!
Please enter your name here