Partisipante Seminariu Internasionál Forum Organizasaun Instituisaun Nasionál Diretu Umanu iha Sudeste Aziátiku (SEANF-sigla Inglés) . Imajen/Nelson de Sousa

DILI, 25 jullu 2019 (TATOLI)-Semináriu internasionál Forum Organizasaun Instituisaun Nasionál Diretu Umanu iha Sudeste Aziátiku (SEANF-sigla Inglés) ne’ebé hala’o iha Dili, prodús ezbosu haat hanesan mudansa klimátika, prevensaun no torturasaun, ema ho defisiénsia no reforsa kooperasaun uza mídia sosiál, hodi implementa iha ida-idak nia nasaun.

Notísia Relevante : SEANF Sei Define Polítika ba Mudansa Klimátika

Semináriu Internasionál ne’e  organiza hosi Timor-Leste liuhosi Provedoria Diretu Umanu no Justisa (PDHJ-sigla Portugés) no partisipa hosi nasaun membru sira hanesan Indonézia, Tailándia, Malázia, Filipina, Myanmar  ne’ebé hala’o durante loron tolu, hahú 23-25 jullu 2019.

Provedora Jesuína Maria Ferreira Gomes, ba Ajénsia TATOLI, hatete, nasaun membru sira sei armonia liu tan ezbosu ne’e durante  enkontru anuál  ne’ebé sei hala’o iha fulan Otubru 2019  hodi hetan aprovasaun hosi forum.

Nia esplika ezbosu prevensaun no torturasaun ne’e nu’udar matadalan ida oinsá atu halo promosaun iha edukasaun, monitorizasaun, komersializa entidade públiku para fó protesaun ba ema ho defisiénsia.

Nune’e mós, esplika Jesuína Gomes, ezbosu alterasaun ba mudansa klimátika ne’e iha relasaun  ho diretu ema nian ne’ebé fó impaktu  ba bee  moos, saúde no mós haree ba asuntu komún hanesan tráfiku umanu no droga.

Nia hatutan, ikus maka uza rede sosiál atu reforsa no partilla servisu entre nasaun membru sira kona-ba rezultadu implementasaun atividade hosi ezbosu haat ne’e rasik.

“Ba ita Timor-Leste sei hetan benefísiu mós ba área hirak ne’ebé define,” hateten Jesuína Maria Ferreira Gomes.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here