Logotipu SAMES. Imajen/Espesiál

DILI 25 jullu 2019 (TATOLI)-Servisu Autónomu Medikamentu no Ekipamentu Saúde (SAMES) hamutuk ho Programa Alimentár Mundiál (WFP-sigla inglés) realiza treinamentu kona-ba ai-han nutrisaun, aprovizionamentu armazen ai-han nutrisaun no aplikasaun ba aimoruk.

“SAMES serbisu hamutuk ho WFP  iha tinan 9 nia laran to’o tinan 2017, ami implementa ona programa sira no sosa Ministériu Saúde nia ai-han nutrisaun  no akordu ne’ebe iha atu servisu hamutuk ho SAMES  mak halo armazenamentu no mós SAMES mak halo distribuisaun ba  fatin sira ne’ebe mak indikadu ona,” hateten Diretora Ezekutiva SAMES, Odete Maria  Freitas  Belo ba Ajénsia TATOLI iha ámbitu Treinamentu Aprovizonamentu armazen ai-han nutrisaun no aplikasaun aimoruk iha, Kampo Alor, Dili, kinta (25/07/2019).

Diretora Odete informa katak serbisu ne´ebé SAMES halo la´ós tanba asuntu jestaun armazen no distribuisaun ba ai-han de´it  no ai-han ne’e la´ós  foun ba  sira no iha treinamemtu ne’ebe SAMES hala´o iha tinan  2017, SAMES hanoin atu halo rekruta  ba pesoál foun sira no pesoál sira mós tenke tuir treinamentu hanesan  hodi hasa’e sira-nia kapasidade, koñesimentu  ba jestaun armazen no oinsa atu bele sosa sasan ne’ebé  tama mai rai laran.

“Ami mós konvida  ministériu sira seluk husi ajénsia sira seluk husi Ministériu Edukasaun no husi ajénsia balun hanesan AIFAESA, husi seguransa alimentár,  husi dezastre naturál no Hospital Nasionál Guido Valadares hodi halibur hamutuk para ami haree, intende didi´ak sosa hahan no distribuisaun ne’e to iha ne’ebé,” nia informa.

Ezekutiva SAMES ne´e dehan, atu rekrutamentu ba pesoál foun sira, SAMES haree ba mapa traballu no forsa traballu. Tanba ne´e, tuir nia, SAMES haruka ona ba Komisaun Funsaun Publika (KFP) no SAMES la´ós haree de´it ba distribuisaun maibé haree mós ba sasan sira no oinsá diresaun finansa ne’e  presiza ema na´in hira no kada departamentu nain hira.

“Tanba  ne’e mak agora atu inklui tan armazem rejionál  rua ne’ebé mak iha provizoriamente, ami rekruta uluk ema na´in ida ka rua ba uluk depois sira tenke  ba iha munisípiu tolu ka haat, entaun ita presiza halo rekrutamentu ba pesoál balun para apoiu iha armazem nasionál nian,” nia informa.

Diretora Ezekutiva SAMES, Odete Maria  Freitas  Belo konfirma katak treinamentu SAMES hamutuk ho WFP nia divizaun mak nutrisaun ne’e saida, se de´it mak iha risku atu monu ba nutrisaun, tanba saida mak ema monu ba iha má nutrisaun no oinsa mak atu define, halo diagnóstika ba ema ne’e hetan nutrisaun,  tipu má nutrisaun ne’e saida.  “Ohin tama ona ba aprovizionamentu oinsá mak sosa ai-han nutrisaun nian,” nia  konklui.

Jornalista: Felicidade Ximenes

Editór      : Rafy Belo 

1 KOMENTÁRIU

HAKEREK NO HATÁN

Please enter your comment!
Please enter your name here