Diretór Jerál Turizmu, José Filipe Dias Quintas. Imajen Egas Cristovão

DILI, 25 jullu 2019 (TATOLI)-Ministériu Turizmu, Komérsiu no Indústria (MTKI) hahú hala’o reabilitasaun ba sítiu turístiku no jardín sira iha Munisípiu Dili, Ainaru no Bobonaru ne’ebé sei finaliza molok loron Konsulta Populár iha 30 agostu.

“Daudaun ne’e, ita hahú iha faze reabilitasaun tanba Orsamentu Jerál Estadu foin ativa loos iha fulan-marsu, maibé Ministériu Turizmu haka’as aan nafatin para bele konklui iha tempu badak molok selebrasaun 30 agostu,” Diretór Jerál Turizmu, José Filipe Dias Quintas ba Ajénsia Tatoli, bainhira partisipa enkontru preparasaun ba loron Konsulta Populár 30 agostu iha Ministériu Finansa Aitarak-Laran, ohin.

Nia akresenta, hahú agostu bainaka importante sira tama mai ona Timor-Leste, tanba ne’e Prezidente Komisaun Organizadora, Xanana Gusmão, husu atubele finaliza reabilitasaun sítiu turístiku sira ne’e hodi selebra eventu istóriku ne’e ho di’ak.

Fatin turístika ne’ebé reabilita, nia hatete iha munisípiu Dili komesa reabilita ona Kristu Rei, estátua João Paulo II, jardín Largo Lesidere, jardín 5 de Maio Kolmera no monumentu 12 Novembru iha Motaél.

Ba Munisípiu Ainaru, hahú reabilita ona Ramelau ne’ebé Na’in-Feto iha no Munisípiu Bobonaru reabilita ona Bee-Manas Marobo.

“Ita-nia orsamentu rihun $400 ne’e, maioria sei aloka ba reabilitasaun sítiu turístiku”, nia dehan.

Reabilitasaun fatin turístika sira ne’e, Diretór José Quintas dehan koordena ho Prezidente Autoridade Munisípiu sira atu asegura no kontrola kompañia ne’ebé hala’o reabilitasaun atu finaliza lalais.

“Tanba Kompañia ne’ebé hala’o reabilitasaun ne’e hili ka manán konkursu públiku liuhusi Autoridade Munisípiu sira,” Quintas dehan.

Notísia relevante : Tinan Ne’e, MTKI Reabilita Uluk Kristu Rei

Jornalista: Florêncio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here