Ministru Agrikultura no Peskas Joaquim José Gusmão dos Reis Martins,Imajen/Egas Cristovão

DILI, 25  jullu 2019 (TATAOLI)-Ministériu Agrikultura no Peska (MAP) sei haruka tan estudante finalista iha área agrikultura hamutuk 72 hodi bá aprende agrikultura moderna iha Izraél.

Ministru Agrikultura no Peska, Joaquim José Gusmão dos Reis Martins, hatete programa haruka estudante timoroan sira bá iha Izraél ne’e, nu’udár kontinuasaun ne’ebé maka antes  ne’e MAP hamutuk ho Ministériu Negósiu Estranjeiru no Kooperasaun (MNEK) Timor-Leste halo ona akordu ho Governu Izraél liuhusi Ministériu Agrikultura Izraél nian.

“Ne’e duni, Ministériu Agrikultura no Peska sei haruka filafali estudante iha fim de julho ou inísiu fulan-agostu, talvés dia 3, hamutuk 72”, dehan ministru Joaquim hafoin remata enkontru ho estudante timoroan hamutuk na’in-55 ne’ebé fila ona mai horisehik, iha edifísiu MAP, ohin.

Iha tinan kotuk, MAP haruka estudante timoroan hamutuk na’in-55 inklui mellór estudante ida, husi etapa dahaat nian no mós team lider ba estudante sira ne’e bá Izraél hodi aprende durante tinan ida.

Ministru Joaquim relata bainhira vizita Izraél iha janeiru 2019, konsege ko’alia ho Governu Izraél liuhusi MNEK hodi husu atu hasa’e tan kuota haruka estudante sira no tinan ne’e, MAP konsege hasa’e to’o na’in-72 iha etapa dalimak nian.

Ministru Joaquim salienta iha nia vizita foin daudaun bá Izraél ne’e hodi haree estudante na’in-55 (ne’ebé fila ona mai) katak sira aprende agrikultura moderna ho sériu tanba husi prosesu aprendizajen porsentu 25 teoria no 75 prátika iha kampu, liuliu iha área ortikultura nian. Aléinde aprende agrikultura moderna, sira mós aprende planu negósiu.

Husi estudante sira ne’ebé mak MAP haruka bá no fila ona mai ne’e, Ministru Joaquim dehan balun kria ona grupu agrikultór, balun prodús ona ai-han balun hodi ba hatama iha loja Kmanek, hafoin remata estudu durante tinan ida iha rai refere.

Tanba ne’e, ba orsamentu tinan oin, MAP hanoin ona, liuhusi programa ne’e rasik bele akumula liután joven timoroan hodi haruka bá estuda iha agrikultura moderna, nune’e fila mai bele kontribui ba dezenvolvimentu, tanba joven sira presiza iha abilidade no kapasidade, labele hein de’it Governu, tanba Governu iha papél ida atu insentiva, maibé bá oin tenke joven sira maka buka rasik.

Jornalista : Natalino Costa

Editora : Maria Auxiliadora

2 KOMENTÁRIU

  1. Boatardi ho Respeitu hakarak husu tulun ba MAP hanesan joven foin sae hakarak involbe a’an hodi aprende iha oportunidade ida ne’e bele ka lae?

HAKEREK NO HATÁN

Please enter your comment!
Please enter your name here