Prezidente Parlamentu Nasionál, Arão Noé de Jesus da Costa Amaral. Imajen/António Goncalves

DILI, 25 jullu 2019 (TATOLI)–Prezidente Parlamentu Nasionál (PPN), Arão Noe de Jesus da Costa Amaral, hateten hafoin Tratadu Ratifikasaun Fronteira Marítima tama iha vigór, hahú hosi 1 setembru 2019, reseita husi kampu Bayu-Undan pursentu 100 ba de’it Timor-Leste.

Nia esplika, tratadu ne’e halo ona ratifikasaun iha Parlamentu Nasionál (PN) foin lais ne’e no loron 30 agostu ne’e troka nota entre Governu Timor-Leste ho Austrália.

“Ita hotu hanoin katak loron 30 agostu hanesan troka nota entre Timor-Leste no Austrália, tanba ne’e loron 1 setembru ba oin Bayu-Undan ninia reseita tomak ne’ebé uluk ita fahe fulan-fulan ho Austrália, ita la fahe ona no pursentu 100 ba de’it Timor-Leste”, tenik PPN ba jornalista, iha Parlamentu Nasionál, kinta ne’e.

Nia haktuir, tuir informasaun ne’ebé nia asesu hosi jornál australianu ida publika katak, semana ida dei’t Austrália hetan millaun $305, ne’ebé reprezenta pursentu 10 husi reseita Bayu-Undan.

PPN dehan, reseita pursentu 10 ne’ebé Austália simu la’ós multa maibé direitu ne’ebé Austrália hetan nafatin bainhira Governu rua seidauk troka nota.

Nia akresenta, akordu ne’ebé asina loron 6 marsu 2018 hateten klaru, tanba operasaun iha tasi Timor ne’e la’o dezde akordu Certain Maritime Arrangament in the Timor Sea (CMATS), entaun akordu iha Nova Iorke ne’e tenke realiza hodi labele prejudika kompañia, tanba ne’e mak lori tempu naruk atu ratifika tratadu.

“Talves hotu-hotu husu tanbasá mak asina ona iha marsu 2018, maibé foin agora mak ratifika. Tanba iha akordu ne’e hateten katak tenke iha asertu entre kompañia sira ho estadu rua mós tenke hadi’a lejizlasaun sira ne’ebé uluk iha, tanba ne’e faze negosiasaun ne’e mak lori tempu naruk”, nia akresenta.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here