Fatuk Sinai ne’ebé lokaliza iha Suku Bene-Ufe, Sub-Distritu Nítibe, Rejiaun Administrativa Espesiál Oé-Cusse Ambeno (RAEOA). Imajen Tolas

DILI, 25 jullu 2019 (TATOLI)—Prezidente Parlamentu Nasionál (PPN), Arão Noé de Jesus da Cossta Amaral haktuir bainhira elabora Konstituisaun Repúblika Demokrátika Timor-Leste (RDTL), Fatuk Sinai ne’ebé lokaliza iha Suku Bene-Ufe, Sub-Distritu Nítibe, Rejiaun Administrativa Espesiál Oé-Cusse Ambeno (RAEOA) la hola parte iha territóriu Timor-Leste.

“Fatuk Sinai hosi inísiu kedas, ita-nia elaborasaun Konstituisaun la inklui hanesan parte ida hosi ita-nia territóriu, maibé bele iha negosiasaun iha asertu ida, tanba populasaun Oé-cusse halo atividade kulturál tinan-tinan iha ne’ebá. Bele asertu ida ho Indonézia para oinsá atividade sira ne’e bele la’o nafatin,” tenik Arão hodi hatán ba pergunta hosi jornalista sira iha Parlamentu Nasionál (PN), kinta ne’e, relasiona ho Timor-Leste no Indonézia asina ona akordu atu tuur hamutuk rezolve fronteira terrestre ne’ebé segmentu balun seidauk solusiona.

Nia akresenta, wainhira Fatuk Sinai laiha Konstituisaun, labele dehan parte ida hosi Timor-Leste tanba tenke respeita mós fronteira entre nasaun rua.

“Ida ne’e ita tenke respeita delimitasaun fronteira entre Timor-Leste ho Indonézia. La’ós foin agora, maibé hahú kedas iha tempu portugés ho Olanda. Sira halo kedas akordu iha tempu ne’ebá no delimitasaun sira ne’e iha tiha ona. Tanba ne’e, labele sai hosi tratadu ne’ebé uluk Portugal ho Olanda asina ona,” Arão esplika.

Tuir membru Asembleia Konstituinte, asuntu kona-ba Fatuk Sinai delikadu uituan tanba ne’e presiza haree fali akordu sira uluk.

“Asuntu ida ne’e uluk ha’u mós membru Asembleia Konstituinte no momentu ne’ebá debate duni asuntu Fatuk Sinai, maibé asuntu ne’e delikadu uituan tanba tenke haree ba ita-ninia delimitasaun sira uluk. Tanba ne’e mak ita labele temi, se lae kontradiz. Negosiasaun mak sei hatudu rezultadu. Ita hein took,” Arão haklaken.

Nia akresenta: “Ita agora foin mak konklui delimitasaun fronteira tasi laran nian, ne’ebé husik ba negosiasaun ba mak ita haree”.

Entretantu, Fatuk Sinai hanesan rai pedasuk ne’ebé komunidade Suku Bene-Ufe tinan-tinan harohan ba fatuk ne’e hodi fó udan-been ba sira, hodi halo to’os no natar.

Iha Konstituisaun RDTL artigu 4 kona-ba Territóriu hateten, territóriu RDTL kompostu husi rai-maran, zona tasi no aéreu, delimita husi ketannasionál sira, ne’ebé istorikamente integra ba parte oriental illa Timor, enklave Oe-cusse Ambeno, illa Ataúro no illa kiik Jaco.

Nune’e iha artigu tuir mai dehan, Lei estabelese ketan tasi, zona ekonomia ezkluziva no direitu Timor-Leste iha zona ne’ebé besik plataforma kontinentál.

Artigu ikus liu koa’lia, Estadu la taka matan ba timoroan nia rai rohan ida eh ba direitu soberania, hodi la-halo aat ba ratifikasaun kona-ba rai-ketan.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here