Ministru Obra Públika, Salvador Soares dos Reis Pires. Imajen António Gonçalves

DILI, 25 jullu 2019 (TATOLI)-Ministériu Obra Públika (MOP) liuhusi Diresaun Eletrisidade Timor-Leste (EDTL) hahú monta ona kontadór pre-pagu foun 1000-resin ba umakain sira iha kapitál Dili ne’ebé seidauk iha kontadór.

Ministru Obra Públika (MOP), Salvador Eugénio Soares dos Reis Pires, hatete iha lei 33/2016, 16 agostu, ko’alia kona-ba konsumidór ne’ebé uza eletrisidade tenke selu tarefa.

“Iha 2018, ami halo konkursu (tender) ba kontadór pre-pagu foun mai ona, ne’ebé ami-nia ekipa EDTL iha fulan ida ne’e (jullu) halo instalasaun ona kuaze 1000-resin ona ba umakain sira inklui kontinua halo inspensaun ba konsumidór illegal,” Ministru Obra Públika ba Ajénsia Tatoli iha Palasiu Governu, ohin.

Nia dehan, akizisaun ne’e liuhusi anúnsiu públiku ne’ebé hala’o husi aprovizionamentu MOP, nune’e pre-pagu foun 30.000 tama ona no progresivamente ekipa EDTL hala’o hela instalasaun.

Tanba ne’e, Ministru Salvador dehan durante tinan rua, lista konsumidór dada ahi ilegál pur volta 30.000 koneksaun durante impase no laiha pre-pagu foun atu hala’o instalasaun.

Iha Orsamentu Jerál Estadu (OJE) 2019, Governu prevee ona osan ho montante $750.000 hodi sosa transformasaun tolu no mákina kontadór pre-pagu unidade 30.000.

Antes ne’e, Diretora Jerál Eletrisidade Timor-Leste (EDTL), Arlinda Miranda Manetelo, dehan hahú husi fulan-jullu tinan ne’e, ekipa EDTL hala’o inspensaun iha kapitál Dili konsege deteta konsumidór dada ahi ilegál.

“Iha tinan rua, hahú 2017 to’o 2018, ami la konsege halo inspesaun tanba impase polítika. Ne’ebé, foin fulan ida ne’e mak ami halo inspensaun iha kapitál Dili deteta 80 dada ahi ilegál”, nia dehan iha kna’ar fatin Kaikoli, foin lalais ne’e.

Ba Munisípiu sira, Diretora Jerál ne’e dehan ekipa EDTL seidauk hala’o inspensaun tanba kestaun finaseira.

Notísia relevante : Kliente EDTL 30.000 Dada Eletrisidade Ilegál Tanba Seidauk Iha Kontadór Pre-Pagu

 Governu Sei Sosa Transformadór Tolu Ho Kontadór Prepagu Unidade 30.000

EDTL Deteta Konsumidór Balun Dada Ahi Ilegál

Jornalista : Florêncio Miranda Ximenes
Editora : Maria Auxiliadora

HAKEREK NO HATÁN

Please enter your comment!
Please enter your name here