Diretór Jerál Estatistika, Elias dos Santos Ferreira, Imajen/Egas Cristovão

DILI, 24 jullu 2019 (TATOLI)-Prezidente Sensu Agríkola 2019, Elias dos Santos Ferreira, husu ba povu agrikultór sira atu fó resposta klaru iha sensu agríkola ne’ebé sei hala’o iha fulan oin.

“Ha’u hakarak husu sensu ne’e ema ida-idak sei filafali bá nia suku, tanba ne’e husu agrikultór sira atu simu ita-nia oan sira hodi fó resposta klaru, liuliu kona-ba rejista animál, tanba resposta di’ak maka ita-nia futuru”, Elias Ferreira ba jornalista sira iha serimónia enserramentu ba treinamentu ba treinadór sensu agríkola 2019, iha salaun Fundasaun Kristal, Balidi, ohin.

Sensu agríkola ne’e sei hahú iha 12 agostu no hala’o durante fulan ida no sei aumenta tan fulan ida hodi haree dadus hotu hafoin iha 2020 bele fó sai ona nia rezultadu.

Programa sensu agríkola ne’e sei finansia ho Orsamentu Jerál Estadu (OJE) hamutuk millaun $5.

Pergunta ne’ebé sei uza iha sensu ne’e hamutuk 102, liuliu iha peska, floresta, rai, haki’ak animál tantu ki’ik ka boot.

Antes atu lansa ofisiál ba sensu agríkola 2019, sei iha apelu hosi na’i-ulun sira, hanesan Prezidente Repúblika, Primeiru-Ministru, Xanana Gusmão, Marí Alkatiri no bispu sira.

Jornalista: Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here