DILI, 24 jullu 2019 (TATOLI)- Governu liuhusi reuniaun Konsellu Ministru, ohin, iha Palásiu Governu, aprova ona rezolusaun governu kona-ba dispensa vistu turizmu nian ba iha sidadaun Indonézia nu’udar implementasaun hosi nota entendimentu entre Timor-Leste, Indonézia no Banku Dezenvolvimentu Aziátiku (ADB) iha relasaun kona-ba asisténsia tékniku komérsiu transfronteirisu no kooperasaun ne’ebé asina ona foin daudaun.
Proposta ne’e aprezenta husi Ministru Defeza no Ministru Interior interinu Brigadeiru Jenerál, Filomeno da Paixão de Jesus, ba reuniaun Konsellu Ministru (KM) ne’ebé lidera husi Primeiru-Ministru, Taur Matan Ruak.
Rezolusaun ne’e atu hametin liután kooperasaun ekonómika no atu hasa’e reseita hosi turizmu transfronteirisu hodi kombate kiak no rezulta oportunidade ekonómika foun hodi hasa’e reseita. Objetivu ida tan mak hanesan preparasaun integrasaun ba ASEAN.
Konsellu Ministru mós fó podér ba Ministru Defeza, Filomeno da Paixão de Jesus, atu hala’o asinatura Memorandu Entendimentu ida ho Ministériu Defeza Japaun nian kona-ba kooperasaun ba edukasaun no formasaun iha área asisténsia umanitária no operasaun sokorru bainhira mosu dezastre ruma.
Ministru Filomeno dehan, rezolusaun ho nia objetivu atu hametin liután kooperasaun ekonómiku no atu hasa’e reseita husi turizmu transfronteirisu atu kombate kiak no rezultadu oportunidade ekonómiku foun hodi hasae’ reseita.
Iha parte seluk mós preparasaun hosi integrasaun Timor-Leste ba ASEAN liuhosi kooperasaun ne’ebé boot ho nasaun viziñu iha futuru, no apoiu ba iha kreximentu no diversifikasaun ekonómiku. Tanba ne’e, Konsellu Ministru mós fó podér tomak ba Ministru Defeza atu hala’o asinatura ba Memorandu entendimentu iha ho Ministru Defeza Japaun kona-ba kooperasaun ba edukasaun no formasaun iha área asisténsia humanitarian no operasaun sokorru bainhira mosu dezastre.
Jornalista : Eugénio Pereira
Editór : Francisco Simões
