Profesór sira balun no estudante balun husi Departamentu Komunikasaun Sosiál, FSS-UNTL hamutuk ho parseiru sira. Foto: Media UNTL

DILI, 24 jullu 2019 (TATOLI) –Vise-dekanu Fakuldade Siénsia Sosiál (FSS), Universidade Nasionál Timor Lorosa’e (UNTL), Julio Aparício informa katak iha tinan 2020 sei iha orsamentu atu apoiu Departamentu Komunikasaun Sosiál para hadi’a kondisaun no kompleta liután fasilidade iha laboratóriu iha departamentu ne’e.

Profesór sira balun no estudante balun husi Departamentu Komunikasaun Sosiál, FSS-UNTL. Foto: Media UNTL

“Ha’u prepara ona planu ba 2020 nian atu hadi’a kondisaun departamentu komunikasaun sosiál nian ho apoiu orsamentu metade husi rihun 30 ne’ebé sei koloka ba departamentu 6 ne’ebé tutela iha Fakuldade Siénsia sosiál nian,” informa Vise-dekanu FSS Asuntu Finansa, Julio Aparício ba Ajénsia TATOLI iha kampus FSS, Kaikoli, iha kuarta (24/07/2019).

Vise-dekanu ne’e haktuir, durante ne’e departamentu komunikasaun sosiál hasoru difikuldade barak tanba laiha fasilidade sufisiente atu garante atividade prátika ba estudante sira.

Nia dehan, fakuldade prepara ona laboratóriu media nian maibé menus fasilidade. “Tanba ne’e mak planu ne’ebé fakuldade prepara ona mak hahú ona ho reabilitasaun ba departamentu neen ne’ebé iha inklui Komunikasaun Sosiál para ba futuru estudante sira bele simu matéria ho di’ak.

Akadémiku ne’e akresenta katak molok atu hateke ba oin tempu badak ne’e sei iha formasaun ba estudante inklui dosente sira para bele ajuda hasa’e tan sira-nia kapasidade oinsá atu iha koñesimentu kle’an liu kona-ba media nian.

“Ami serbisu hamutuk ho UNICEF atu realiza formasaun ne’e iha setembru nia laran no agora ami hetan apoiu kamera balun husi UNESCO atu fasilita di’ak liután treinamentu ne’e,” informa profesór universitáriu ne’e.

Nia hatutan, atu prodús estudante ida atu sai ema ne’ebé atu serbí rai povu no estadu ida ne’e, fakuldade kontinua esforsu atu hetan dosente ne’ebé di’ak no kualidade para tulun hasa’e kapasidade estudante sira nian.

“Tanba departamentu ne’e mak sei prodús ema ho kualidade para divulga informasaun ho loloos no balansu ba públiku iha futuru mai,” garante Vise-dekanu FSS Asuntu Finansa, Julio Aparício.

PERFIL

Departamentu Komunikasaun Sosiál UNTL nu’udar kursu ida ne’ebé eziste iha Fakuldade Siénsia Sosiál (FSS), lokalizadu iha Kampus Kaikoli (Eis-UNTIM) hamutuk ho kursu lima seluk hanesan Administrasaun Públika (AP), Polítika Públika (PP), Siénsia Governamentál (SG), Relasaun Internasionál (RI) no mós Dezenvolvimentu Komunitáriu (DK).

Departamentu Komunikasaun Sosiál estabelese ho inisiativa mai husi Reitór Benjamin Corte Real de Araújo no nomea Profesór Filomeno Jacques Fernandes nu’udar xefe departamentu, ne’ebé nia formasaun akadémika mak língua portugeza no hamahon aan Fakuldade Edukasaun Arte no Umanidade (FEAU). Departamentu ne’e eziste hahú 2008. Kursu ne’e eziste tanba apoiu mós husi ICFJ (International Center for Journalist).

Hafoin Reitór Benjamin Corte Real ramata mandatu no substitui husi profesór Aurélio Sergio Cristovão Guterres hodi sai nu’udar reitór UNTL iha 2009 nune’e Departamentu Komunikasaun Sosiál transfere no tutela fali ba Fakuldade Siénsia Sosiál (FSS).

Departamentu ne’e bainhira eziste, fatin úniku ne’ebé iha hodi prátika mak Rádiu Akadémika, iha ne’ebé lidera husi Profesór Miguel Maia no sob protesaun husi Vise-reitór Asuntu Akadémiku. Maibé, hafoin transferénsia husi FEAU ba FSS, Rádiu Akadémika ho frekuénsia 90.00 FM responsabiliza husi profesór Elvis F. Brites da Cruz, M.Ed no ho protesaun Vise-reitór III Asuntu Estudantíl, Profesór José António L. D. da Costa, M, GPP.

Alende Rádiu Akadémika, atu fasilita di’ak liután estudante Departamentu Komunikasaun Sosiál, iha loron 20 fulan abril tinan 2012 UNTL lansa tan primeiru jornál ho naran Semanál Akadémika, iha Liceu, UNTL. Lema ba Semanál ne’e mak “Aprende ne’e Prosesu Ida La’ós Produtu Finál. Enkuantu, konteúdu husi Semanál ne’e oferese ho lian ofisiál rua; portugés no tetun (uza tetun padraun ortografia), haktuir ba Konstituisaun Repúblika Demokrátika Timor-Leste (RDTL), artigu 13o alínea (b).

Rubrika Semanál Akadémika inklui Rádiu Akadémika mak hanesan Previzaun Tempo, Desportu, Proza, Hamaluk Belun, Horoscopo, Kuriozidade, Karau Dikur ba Dame (KDD), Babadok Rebenta, Aprende Tetum, Aprende Portugés, Estrela Campus, Istória, Saúde Ambientál, Kulinária, Poema, Kakatua English, Lidun Akadémika, Kafé Lokraik, Buka Hatene Pakote, Mai vizita Ita-Nia Kursu no Dikas ka Tips.

Programa hirak ne’e responsabiliza hus Miguel Gonçalves nu’udar estudante dahuluk Departamentu Komunikasaun Sosiál hamutuk kolaboradór sira seluk husi estudante Komunikasaun Sosiál.

Entretantu, husi 2008 to’o ohin loron Departamentu Komunikasaun Sosiál halo ona tinan 11. Graduadu husi departamentu ne’e espalla ona mós iha instituisaun komunikasaun sosiál estadu no mós privada sira iha Timor-Leste.

Xefe Departamentu Komunikasaun Sosiál atualmente mak Profesór Marcelino Magno ho Vise mak Profesór Roberto Pacecho.

Notísia relevante: http://www.tatoli.tl/2018/03/03/hasae-kualidade-neneik-maibe-bebeik/?fbclid=IwAR3zw3m5t_WpwPALWpfKGACIzr5bMATw12JWVe_kG_fxdiCfycklMWDFkS4

CS-UNTL Komemora Vitória ho Amizade

Jornalista      : Tomé Amado

Editór             : Rafy Belo

HAKEREK NO HATÁN

Please enter your comment!
Please enter your name here