DILI, 24 jullu 2019 (TATOLI) – Avansadu prinsipál FC Lero, Anizio Correia sente orgullu no haksolok bainhira bele hamutuk ho ekipa Primeira Divizaun, Ponta Leste durante tinan lima nia laran.
Tanba ne’e, nia dehan, la-fásil hamutuk ho ekipa boot sira iha Primeira Divizaun ne’ebé maioria jogadór barak mak iha esperiénsia maka’as.
“Ida ne’e hanesan konfiansa ida hosi na’in ba klube hodi fó mai ha’u. Ha’u sei hatudu jogu ne’ebé mak di’ak, nune’e bele lori Ponta Leste atu atinje nia objetivu,” dehan Anizio ba Agência Tatoli iha Estádiu Munisipál Díli, kuarta ne’e.
Nia konfesa, hanesan jogadór ne’ebé ho idade ki’ik maibé bele hamutuk ho klube zigante hanesan Ponta Leste, tanba ne’e nia sente dalan di’ak ida hodi bele aumenta liu-tan esperiénsia no talentu.
“Ha’u-nia pozisaun iha Lero hanesan avansadu no agora iha Ponta Leste hanesan mós avansadu, númeru kamizola mak muda, maibé ida ne’e di’ak hela. Ha’u la hanoin atu joga iha ekipa boot hanesan Ponta Leste maibé derepente ha’u hetan kontaktu hosi Ponta Leste ha’u mós kontente,” dehan nia.
Anizio sente diferente tebes ho klube ne’ebé antes ne’e nia hamahan-án ba.
“Uluk iha Lero hau sente oin seluk, maibé ohin ha’u iha Ponta Leste sente oin seluk. Nia diferente mak treinamentu iha Ponta Leste bele dehan maka’as tebes, iha Lero treinamentu di’ak hotu maibé ladún,” nia haktuir.
Durante iha FC Lero, Anizio uza kamizola (10), enkuantu iha Ponta Leste (19), maski nune’e númeru kamizola ba nia la’ós kestaun, maibé kestaun mak oinsá nia hatudu jogu ne’ebé di’ak nune’e bele lori Ponta Leste ba oin.
Jornalista: Hortencio Sanchez
Editór: Xisto Freitas
Notísia Relevante: Jogadór Prinsipál Rua Husi Kablaki no Lero Hamutuk Ho Ponta Leste
