Prezidente Komisaun Organizadora ba Festa Konsulta Populár, 30 agostu 2019, Kay Rala Xanana Gusmao. Imajen/Antonio Goncalves

DILI, 23 jullu 2019 (TATOLI)-Xefe Negosiadór Prinsipál ba asuntu Fronteira Marítima, Kay Rala Xanana Gusmão, fiar katak  Prezidente Repúblika, Franscisco Guterres Lú Olo, sei promulga lejizlasaun  haat ne’ebé Parlamentu Nasionál aprova ona iha finál Globál.

“Ha’u fiar katak nu’udar Prezidente Repúblika halo tuir saida mak konstituisaun haruka”, Xefe Negosiadór ba asuntu Fronteira Marítima, Xanana Gusmão, dehan hafoin Parlamentu Nasionál aprova lei haat husi Governu iha finál globál, ohin.

Hatán bainhira Prezidente Repúblika  la promulga, Xanana Gusmão dehan : “nia impaktu ne’e laiha ratifikasaun fronteira marítima no atu ratifika tratadu ne’e iha 30 agostu mós sei la akontese, ita sei hein to’o Prezidente Repúblika promulga”.

Líder rezisténsia ne’e sente  kontente tanba Timor-Leste konsege diskute nia fronteira marítima ho nasaun ne’ebé dezenvolvidu tebes.

“Ha’u kontente tanba ita hetan fronteira ida ho país ida ne’ebé toos tebetebes. Antes ita ukun aan iha 1999,  sira (Austrália) asina ona kontratu ho Indonézia hodi foti ita-nia rikusoin ne’ebé pasadu sira ne’e hatudu mai ita katak presiza halo negosiasaun ho esforsu maka’as”, Xanana dehan.

Iha parte seluk, Xanana Gusmão hatán mós bainhira bankada  parlametár balun vota kontra, nia dehan ne’e normál tanba iha prosesu demokrátiku nia laran. “Lalika temi buat sira ne’e, ita iha demokrasia laran.”

Nune’e nia  afirma : “Ita hotu sente katak tinan ida ne’e loke ona dalan negosiasaun ne’ebé atu hahú ho Indonézia kona ba fronteira maritima”.

Tanba ne’e, Xanana Gusmão husu ba públiku atu lalika dúvida ona tanba kodoras (pipeline) sei dada mai iha Timor-Leste.

“Ha’u sente kontente tanba apezár de 20 anos de’it mós ita halo buat balun, rai barak ukun aan kle’ur ona, ha’u bá vizita sira aat liu ita, ne’ebé ita sente katak di’ak no ita kontinua la’o neneik ho esforsu maka’as ho vontade atu serví labele lakon”, Xanana dehan.

Notísia relevante : PN Aprova Ona Proposta Lei Haat iha Finál Globál

Jornalista: Florêncio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here