DILI, 23 jullu 2019 (TATOLI)-Departamentu tolu iha Universidade Oriental Timor Lorosa´e (UNITAL) hanesan departamentu Jestaun turístika, departamentu Jestaun Jerál no Departamentu Akuntabilidade hetan sansaun husi ANAAA (Ajénsia Nasionál Avaliasaun no Akreditasaun Akadémika-sigla portugés) iha 2018 tanba seidauk prienxe kritériu.
Bazea ba kritéria ANAAA, departamentu tolu ne´ebé tutela ba Fakuldade Ekonomia hodi kumpre sansaun sira, durante tinan rua labele simu estudante foun no la iha prosesu graduasaun ba estudante departamentu tolu ne´e.
“Sansaun ANAAA nian ne’e nu´udar alternativu ida atu obriga Instituisaun Ensinu Superiór UNITAL atu fó atensaun maka´as liután departamentu tolu ne’e hodi prienxe rekezitu ne’ebé iha,” hateten Dekanu Fakuldade Ekonomia UNITAL, Arlindo do Céu ba TATOLI iha ninia kna´ar fatin Fakuldade Ekonomia, UNITAL, Becora, tersa (23/07/2019).
Tuir dekanu ne´e katak departamentu tolu ne´e la prienxe kritériu tanba momentu ne´e UNITAL hasoru hela krize finanseiru, entaun departamentu tolu hasoru difikuldade ho ninia rekursu atu alkansa no ezerse nia prosesu ensinu aprendizajen ho di´ak.
“Ami konsidera duni departamentu tolu ne’e laiha rekursu durante ne’e tanba universidade antes ne’e hasoru problema finanseiru, tanba ne’e rekursu barak husi departamentu tolu ne’e tranferénsia fali ba departamentu seluk,” informa akadémiku UNITAL ne´e.
Nia hatutan , kuandu ANAAA ezerse ninia avaliasaun iha universidade ne’e laiha dalan seluk, opsaun ida de’it mak universidade ne’e tenke hasa’e kualidade no kuantidade para tinan tuir mai bele hetan akreditasaun.
Maibé husi sansaun ANAAA nian ne’e, Dekanu Arlindo konsidera nu´udar motivasaun bo’ot ba UNITAL atu aselera ninia prosesu. Tan ne’e liuhusi polítika interna universidade nian halo ona mudansa signifikante ba Fakuladade Ekonomia atu hatan fila fali avaliasaun tuir mai.
“Ami-nia departamentu 3 ne’e iha ona progresu, ninia rekursu umanu sufisiente ona tanba dosente sira ne’ebé mak antes ne’e S1 (lisensiadu) kontinua tan foti mestradu no agora ramata, sira fila ona mai atu kontinua haforsa fali departamentu 3 ne’ebé la akredita,” dehan dekanu ne´e.
Nia mós informa, planu avaliasaun ANAAA nian ba étapa daruak sei kontinua fali iha loron 3 agostu 2019 tanba ne´e serbisu lubuk ida mak Fakuldade Ekonomia prepara ona atu garante departamentu tolu ne’e hamrik iha kondisaun.
“Mudansa lubuk ida mak fakuladade ne’e alkansa mak rekursu umanu, estabelesementu laboratóriu, kooperasaun entre instituisaun inklui reintrega estudante sira ba iha komunidade hodi halo estudu iha terenu, realiza hotu ona,” konklui dekanu Fakuldade Ekonomia UNITAL ne´e.
Jornalista : Tomé Amado
Editór : Rafy Belo
