Ministru Justisa, Manuel Cárceres da Costa. Imajen/António Gonçalves

DILI, 23 jullu 2019 (TATOLI)-Ekipa Tékniku Konsellu Koordenasaun Justisa, oras ne’e, elabora hela proposta lei organizasaun judisiáriu hamutuk  artigu 112  atu submete ba Konsellu Ministru  iha tempu besik.

Informasaun ne’ebé TATOLI asesu husi Diresaun Nasionál Asesoria Jurídika no Lejizlasaun, Ministériu Justisa, katak governu fó ona prazu atu finaliza  ezbosu proposta lei refere hodi submete ba governu liuhosi reuniaun  Konsellu Ministru.

Ministru Justisa Manuel Cárceres da Costa,  hateten,   besik ona tinan  20 Timor-Leste seidauk prodús  rasik ninia Lejizlasaun  lei organizasaun judisiáriu hodi uza lei UNTAET 11/2000 to’o ohin loron.

Lei organizasaun Judisiáriu  iha tempu governasaun UNTAET ne’e maka kria hela Tribunál Distritál hanesan  instánsia dahuluk no segundu instánsia maka Tribunál Rekursu.

Alende ne’e, Kria mós Tribunál haat hanesan Tribunál Distritál Dili, Baucau, Suai  no Tribunál Distritál Oe-Cusse.

“Iha regulamentu ne’e mós kria ita nia Ministériu Públiku, Prokuradór Jerál Repúblika ninia nivel hanesan ho Tribunál Rekursu, depois kria mós prokuradoria distritál sira, no regulamentu UNTAET nee mós hatete alargamentu mapa judisiáriu nee  hodi kria tan Tribunal iha munisípiu seluk, maibé lei nee UNTAET nian.  Ita estadu soberanu ona tanba ne’e ita tenke prodús ita nia lei rasik,” afirma Ministru  Manuel Cárceres da Costa, ohin,  ba Jornalista sira iha Ministériu Justisa, Caicoli, Dili.

Nia dehan, Lei organizasaun Judisiáriu ne’e importante hodi haree mapeamentu atu haree nesesidade atu aumenta Tribunál Distritál, Ministériu Públiku iha Munisipiu sira seluk tan.

“Agora daudaun primeira instánsia maka Tribunál Distritál no segundu instánsia maka Tribunál Rekursu, rekursu ne’e to’o iha Tribunál Rekursu ka presiza harii Tribunal Supremu iha Nasaun Demokrátiku ida, tanba ne’e lei organizasaun judisiáriu ne’e  sei hakarak mantein Tribunal Rekursu hanesan segundu instánsia ka husi primeira instánsia direta ba Tribunál Supremu Justisa. Buat sira ne’e maka sei pondera iha lei organizasaun judisiáriu,” esplika Ministru Justisa.

Ezbosu lei organizasaun judisiáriu ne’e sei apoiu governu atu halo mapeamentu ba dezenvolvimentu setór justisa ida di’ak liután.

Jornalista : Agapito dos Santos

Editór       : Francisco Simões

HAKEREK NO HATÁN

Please enter your comment!
Please enter your name here